Manipur : Union Minister ngen angin New Delhi-ah meeting nei
Union Home Minister Rajnath Singh ngenna angin, Manipur Chief Minister Okram Ibobi Singh leh Nagaland Chief Minister TR Zeliang-te chuan Nilaini khan Delhi-ah Manipur buaina thleng mek chungchangah meeting an nei.
Meeting-ah hian United Naga Council (UNC)-te'n hun rei tak chhung National Highway an dan chah chungchang an sawi ho a ni. Union Home Minister ngenna angin Manipur Chief Minister hian Thawhlehni chawhnu lam khan, Imphal chhuahsanin New Delhi a pan a, Deputy Chief Minister Gaikhangam-an a ṭawiawm. He huna tel tur hian Nagland Chief Minister Zeliang chu sawm a nih angin a tel bawk. Meeting-ah hian kum 2016 November 1 aṭanga UNC-te'n Manipur-a National Highway kawngpui pawimawh pahnih an dan chah chungchanga hmalak dan tur an sawi ho a ni.
Rajnath Singh chuan Manipur buaina chinfel kawnga hma lakpuiah Nagaland Chief Minister TR Zeliang chu a sawm a, Naga hruaitute chu inbiakna neihpui an neih theih nana hma la turin a ngen. Rajnath Singh chuan Zeliang chu Naga pawl hruaitute hmin an nih theih nana hma la tura ngenin, hun rei tak chhung kawngpui dan chah tawh hawn thui a nih theih nana hma lakpuiah a sawm.
Zeliang chuan UNC-te hian Manipur sorkar aiawh leh sorkar laipui palaite nena inbiakna neih an phut niin Union Home Minister a hrilh. UNC-te thil phut hi Ibobi leh Gaikhangam-te chuan an pawm tawh a, Manipur sorkarin Imphal-a inbiakna neih tura a lo rel tawh chu, UNC-te chuan New Delhi-a sawn an phut niin a sawi bawk. Rajnath Singh leh Ibobi Singh-te chuan remna kawng zawnga Nagaland CM TR Zeliang-a hmalakna chu fakawm an tih thu an sawi a ni.
Union Home Minister chuan dan pangngaia lirthei chitin tlan theih tura NH-37 hawn a ni leh ta chu lawmawm a tih thu a sawi a, hetih lai hian tun thlenga NH-2 dan chah a la ni chu ngaimawhawm a tih thu a sawi. Kawngpui dan chah chuan State Assembly Election a ngawng buai thei tih sawiin, inthlan hma ngeia hawn a nih theih nana hma lak a ṭul thu a sawi. Manipur chungchangah hian chak zawka hma la turin Ministry of Home Affairs-ah thlen a nih tur thu a sawi. Rajnath Singh chuan, Manipur sorkar chu India danpuiin a phut angin, mipuite chunga harsatna nasa tak a thlen lohna tura dan leh thupek kenkawh chungchangah a hlawhchham a ni, a ti bawk.
Nikum November 15 khan sorkar laipui hmalaknain New Delhi-ah inbiakna neih a ni a, Manipur sorkar chuan palai a tir lo thung. December 22 khan Union Home Minister chuan Manipur CM lehkha thawnin, NH dan chah chu dankalh a nih thu a hrilh a, UNC-te hmalakna titawp tura hma la turin a hriattir. Manipur sorkarin a ngen angin sorkar laipui chuan Manipur-ah hian central paramilitary force ṭhahnem tak a tir lut.
Manipur sorkar chuan UNC-te chu January 23-ah remna zawnga Imphal-ah inbiakna neihpui turin a sawm. Ruahman dan chuan inbiakna hi Secretariat (South Block) conference hall-ah neih tur a ni dawn a, hetih lai hian UNC-te hian chhanna an la pe lo nia tarlan a ni. Inbiakna nei tur hian Ministry of Home Affairs chuan January 13 khan Manipur sorkar hnenah ziaka ngenna a thlen niin, State Chief Secretary Oinam Nabakishore chuan a sawi.
Manipur buaina chungchangah hian kar kalta Pathianni khan Rajnath Singh chuan meeting a lo ko tawh bawk a, he hunah hian Defence Minister Manohar Parrikar, Army Chief General Bipin Rawat, Finace Minister Arun Jaitley leh sorkar mi pawimawh eng emaw zat an tel a ni.