Congress party-in Pawisa tihthih duh lohna lantir

Assam Pradesh Cong­ress Committee-te chuan sorkar laipuiin pawisa note lian a tih thih chungchanga lungawi­lohna lantirin, Nilaini khan Guwahati-a Reserve Bank of India office kawtah an pungkhawm.

APCC member pung­khawm-te hian RBI gate luh an tum a, security-te chuan an lo dang a ni. APCC president Ripun Bora chuan, Modi-a kaih­hruai sorkar chuan India danpui a palzut a ni a ti a, mipuite chunga tawrhna nasa tak a thleng hi APCC chuan dem tak zet a ni, a ti bawk. APCC president hi man a ni a, a hnuah chhuah leh nghal a ni.

Hetih lai hian Megha­laya-ah pawh Rs 500 leh Rs 1,000 note tih thih duh lohna lantir a ni bawk. Pawisa tihthih duh lohna lantirtute hi Congress party an ni a, Shillong-a Reserve Bank of India (RBI) office tualah Nilaini khan an pungkhawm. Pungkhawmte chuan Modi-a bang tura an phutna te, pawisa note tihthihin mipuite chunga harsatna a thlen mek an duh loh thu te an auchhuahpui. He hunah hian Congress hruaitu hlun tak tak an tel a, Assam Congress minister hlui Rockybul Hussain bakah, Arunachal Pradesh MP hlui Takam Sanjoy-te pawh an tel.

Meghalaya-a pawl pahnih - Civil Society Women’s Organisation leh Thma U Rangli-te chuan RBI office kawt laiah hian lungawi lohna an lo lantir bawk a, Bharatiya Janata Party (BJP) leh Congress party-te chu eirukna laka filhlim lo an nih thu an auchhuahpui a ni.