Rajnath Singh-a'n Manipur-ah Paramilitary force tam zawk tirhluh a tiam

21st January, 2017

Union Home Minister Rajnath Singh chuan Manipur buaina chingfel turin, central paramilitary force tam zawk tirhluh belh a nih tur thu a sawi.

Member 17 awmna Joint Forum for Peace team-te chuan Ningani khan Rajnath Singh hi an dawr a, an harsatna tawh mek chinfel a nih thuai theih nana hmalakpui turin an ngen. December 22, 2016 khan, pawl hrang hrang 64 inzawmkhawmte chuan Joint Forum for Peace hi an din a ni. Team-te hian Union Home Minister hnenah hian memorandum an thehlut a, an thil phut hrang hrangte an tarlang. Prime Minister Narendra Modi hmu tura palai tirh an tum thu Home Miniter hi an hrilh a, NH danchah duh lohna lantira Delhi-ah nawrh huaihawt an tum tih an sawi bawk. Palaite hnenah hian Rajnath Singh chuan buaina chingfel tura paramilitary force tam zawk tirhluh belh a lo tiam a ni.

Singh chuan, United Naga Council (UNC) leh an thurualpui National Socialist Council of Nagaland-Isak-Muivah (NSCN-IM)-te chu National Highway dan chah mek titawp tura a ngen tawh thu a sawi. Naga hel pawl NSCN(IM)-te hian nasa takin UNC-te hi a ṭanpui ṭhin nia sawi a ni a, NH dan chah a nih chungchangah pawh hian an inrawlh thuk hle a ni.

Manipur Chief Secretary O. Nabakishore chuan UNC-te chu January 23-ah remna zawnga inbiakna neihpui turin state sorkar chuan ruahmanna a siam tih a lo sawi tawh a, hei hi sorkar laipuiah pawh thlen a ni tawh. Nabakishore chuan inbiakna nei tura UNC palai Imphal pan turte chu venhimna ṭha tawk tak pek an nih tur thu a sawi bawk. Hetih lai hian UNC-te hian inbiakna hi Imphal-ah neih an duh lo nia sawi a ni a, Senapati district-a an office-ah emaw Delhi-ah emaw inbiakna neih an duh a ni. Congress kaihhruai sorkar hnuaiah tribal-te rahbehin an awm mek niin an sawi a, Imphal-a inbiakna neih chu an tan a him tawk lo niin an sawi.

Manipur buaina chungchanga hmalak dan tur ngaihtuah hian Nilaini khan Delhi-ah Union Home Minister Rajnath Singh, Manipur Chief Minister Ibobi Singh leh Nagland Chief Minister TR Zeliang-te chuan meeting an lo neih tawh bawk. Meeting-ah hian hmalak dan tur hrang hrang sawiho a ni a, state pahnih chief minister-te chu Singh hian remna zawnga Naga hruaitute dawr turin a lo ngen. National Highway dan chah mek hi tihtawp thuai a nih loh chuan, March 4 leh 8-a state assembly inthlan neih turah nghawng ṭha lo a neih dawn thu a hrilh bawk.

Kum 2016 November 1 aṭanga UNC-te'n Manipur sorkar-in Sadar Hills leh Jiribam-te district-a hlangkai tura hma a lakna duh lohna lantira NH an dan hian ngawng a nei lian hle. Manipur sorkar chu dan leh thupek khauh zawka kengkawh tura tih ni ṭhin mah se, tun thlengin buaina hian ziaawm lam a la pan tak tak thei lo a ni. Sorkar laipui chuan buaina chingfel tur leh dan leh thupek khauh zawka kenkawh a nih theih nan central paramilitary force ṭhahnem tak a tir lut tawh a, boruak a la ralmuan tak tak theih loh avangin Union Home Minister Rajnath Singh chuan central paramilitary force tam zawk tirhluh belh an nih tur thu hi a puang leh ta a ni.

Hetih lai hian Manipur-a hmeichhe pawl, Women for Just-Peace palaite chuan Nilaini khan, Union Minister of state (Independent Charge) for Development of North Eastern Region (DoNER) Jitendra Singh an hmu a, remna leh muanna a awm thuai theih nan hmalakpui turin an ngen. DoNER minister hnenah hian memorandum an thehlut a, kum 2016 December 8-a state sorkarin district thar pasarih pek a remtih hnua buaina leh harsatna an tawh hrang hrangte an tarlang. District pek tura tih te hi state sorkar chuan district puitling-ah a hlangkai vek tawh a, Sadar Hills erawh UNC-te dodalna avangin district-ah puan a la ni lo thung.

Women for Just-Peace palaite chuan, district thar piang ta chuan Manipur-a hnam hrang hrang inkarah buaina a chawk chhuak a, hei hian state chhung boruak a tiralmuang lo tak zet tih an sawi. Prime Minister Narendra Modi chu inrawlh tura an phut thu DoNER minister hnenah hian an thlen bawk a, minister chuan hma lakpui a lo tiam a ni.