Home Minister-in Assam Police hnenah President’s Colour a hlan

Assam tlawha zin, union home minister Amit Shah chuan nimin khan Assam Police-te chu kum 25 chhunga an hnathawh ṭhat avangin military/police hnena chawimawina sang pek ṭhin, President's Colour a hlan.

Chawimawina atan hian special flag, 'Nishaan' tih chu hlan ṭhin a ni. Assam police-te hnena flag hlanah hian Assam map ziah a ni a, star 36, state chhunga district awm zat dah bawkin, Assam-in a larpui samak ki khat nei lem leh Assam Police motto ziahlan a ni bawk.

Assam hi President's Colour dawng thei state 10-na a ni. He chawimawina hi military/police unit, remna leh muanna a awm theihna atan leh, indona hmuna ram tana hnathawkṭhate hlan an ni.

Assam Police-te hian pawikhawihna thleng titlem tura an hmalakna te, inlakhran duhtu pawl an beihletna te, mipuite himna atana an hnathawh leh, state chhunga dan leh thupek kenkawh ṭhat avangin he chawimawina hi an dawng a ni. Assam hma hian Maharashtra, Himachal Pradesh, Uttar Pradesh, Tamil Nadu, Jammu and Kashmir, Haryana, Gujarat leh Tripura state-te chuan President's Colour hi an lo dawng tawh a, Union Territory zingah Delhi chu dawng awmchhun a la ni bawk.

Nimina Guwahati-a Alankaran Parade' ceremony neihah Amit Shah chuan Assam director general of police Bhaskar Jyoti Mahanta hnenah he chawimawina hi a hlan a, chief minister Himanta Biswa Sarma pawhin he hun hi a hmanpui a ni.