AP Dy CM-in May 31-ah pension case tifel vek turin hriattir

Arunachal Pradesh deputy chief minister Chowna Mein chuan state sorkar hnuai department zawng zawng hotute hnenah, May 31-ah an department ṭheuha pension case tikhawtlai la awm chu chinfel hman vek turin a hriattir.

Deputy CM chuan, "Sorkar hnathawk, kum 30 chuang zet theihtawpa an thawh hnua chawlte hi an pension-na tur thil tihfel sak lawk loa harsatna siamsak an ni tur a ni lo. Hetianga an case lo tikhawtlai sak hian sum lam thlengin harsatna a thlen a, a bikin Group C leh D amiten an tuar ṭhin a ni," a ti.

Hei vang hian department hotu tinte chu pension case chu dah pawimawh a, pension case chu engmah tikhawtlai loa tihfel sak nghal zel turin a hrilh. Hei bakah hian department tinah pension cell hawng vek a, pension case buaipui tur bik experienced staff dah vek turin a ti bawk a ni.

Audit and pension director K Ronya chuan pension case tikhawtlai mek hi 398 a awm tih a sawi a, tikhawtlai an nihna chhan chu department lamin paper pawimawhte an thehluh kim loh vang te; promotion, pay enhancement leh increment chungchangah tihfel loh awm ṭhin vangte a nih thu a sawi. Ronya chuan department tin hotute chu initial pay statement(IPS) enfiah fo tur leh, an department-a thawk pension turte chu an chawlh hma thla 4-16 chhunga pension tihfelna tur document pawimawhte tihfel sak turin a chah. Department lamin lehkha pawimawhte an tihfel nghal chuan, directorate chuan pension chungchang hi an chawlh aṭanga thla hnih chhungin a tifel thei nghal zel a ni, a ti.