Imphal-a eviction drive neihnaah mi 4 in hliam tuar

Manipur sorkarin Thawhṭannia Imphal East district-a New Checkon Tribal Colony-a sorkar hmuna awmte chhuahtir tuma hmalaknaah buaina a chhuak a, civil mi paliin hliam an tuar.

New Checkon Tribal Colony-a chengte chuan sorkarin eviction drive a neih hi duh loin an lo dodal a, police-te chuan mipui pungkhawm hnawtdarh nan hian tear gas-te an hmang a ni. Mipuite an lo dodal avang hian in leh building dang pawh tihchhiat a ni lo a, a tihchhiatna tura hmanrua dahte erawh drive kalpuina tur hian dah chhunzawm an ni.

Imphal East DC Th Diana chuan kum khat liamtaah khan sorkar quarters-a chengte hi chhuak tura hriattir an ni tawh a, mahse thupek an zawm duh lo niin a sawi. Quarters ding laite hi an hlui tawhin an dinhmun pawh a ṭha tawh lo a, hei vang hian ṭhiata building thar sak tum a ni, a ti. Sorkar quarters ṭhiah an tum hoah hian chhungkaw 187 an cheng mek.

He hmuna chengte hian chhuahtir an nih dawn chuan an awmna tur hmun dang ngaihtuah sak turin sorkar an ngen tih an sawi.

Chief minister N Biren Singh chuan dan kalha sorkar quarters-a chengte dapchhuah leh chhuahtirna turin hma lak a nih tur thu a lo sawi tawh a, sorkar hnathawk zingah an quarters midang luah chhawntir chu an hna aṭanga suspend an ni dawn tih a sawi bawk.