Meghalaya-ah AFS vangin vawk 259 thi tawh

Meghalaya state-ah vawk hri, African Swine Fever (ASF) vangin kuminah Ri-Bhoi district-ah vawk 259 an thi tawh tih veterinary and husbandry department-a senior official chuan a sawi.

Veterinary and Animal Husbandry Department principal secretary GHP Raju chuan,"Ri-Bhoi district-a khaw paliah vawk 259 an thi tawh a, heng vawkte hi ASF an kai tih finfiah vek an ni," a ti. Pathianni bik khan he district-ah hian vawk 45 an thi tih a sawi bawk.

Department-in livestock census a neihah, Ri-Bhoi district-ah hian vawk 53,000 chuang awmin, state pumah vawk vulh lai chhinchhiah nuai 3.85 a awm.

Veterinary department chuan April 13 khan Ri-Bhoi district-ah ASF kai hi hmuh a nih thu report hmasa ber siamin, Prevention and Control of Infectious and Contagious Diseases in Animals Act, 2009 hnuaiah he hri kai an hmuhna, Umshorshor khua aṭanga km 10 bial chhungah vawk phurhchhuah leh lakluh bakah vawk talh khapna thupek a tichhuak tawh a ni.