UNC-in Manipur sorkar sawmna hnawl

23rd January, 2017

Manipur sorkarin remna zawnga inbiakna nei tura a sawmna chu United Naga Council (UNC)-te chuan a hnawl.

Manipur sorkar chuan UNC chu vawiina inbiakna neihpui turin a sawm a, mahse a hlawhtling dawn ta rih lo a ni. State sorkar chuan UNC leh sorkar laipui aiawhte chu Imphal-ah remna zawnga inbiakna nei turin ruahmanna a siam a, hei hi sorkar laipui pawhin a pawmpui a ni. Mahse state sorkar laka lungawi lohna lantir mek UNC-te'n inbiakna neih an duh tak loh avang hian ruahmanna dang siam a ngai dawn ta a ni.

Manipur sorkar chuan boruak muanawm tak hnuaia inbiakna neih a nih theih nan, UNC palaite chu venhimna ṭha tak pek a lo tiam tawh a ni. Hetih lai hian UNC-te chuan Imphal-a inbiakna neih an duh lo tih an lo sawi tawh a, New Delhi-ah neih an phut. UNC-te chuan inbiakna chu Naga-te chenna huamchhungah emaw, New Delhi-ah emaw neih an duh nia tarlan a ni a, sorkar laipui chu inbiakna kaihruai turin an phut bawk. Heng bakah hian police custody-a awm mek UNC President Gaidon Kamei leh Information Secretary SK Stephen-te chu chhuah phawt an phut a, an thil phut sorkarin a tihlawhtling hmasa a nih loh chuan inbiakna neih an duh lo.

January 17 khan state sorkar chuan sawmna hi a pe chhuak a, January 20 khan UNC-te chuan Ministry of Home Affairs (MHA)-ah an harsatna tawh leh an thil phutte an thlen ve leh. Tunhnaia district-a hlankai Tengnoupal, Kamjong, Kangpokpi, Noney leh Jiribam-ah te Republic Day lawmna neih loh an duh thu an thlen. District pek a nih dan hian inremna thuthlung an lo ziah tawh a bawhchhia nia sawiin, Naga mipuite chuan an pawm ve lo tih an sawi.

Remna kawng zawnga inbiakna neih a nih theih nan hian, Union Home Minister Rajnath Singh chuan Manipur Chief Minister O Ibobi Singh leh Nagland Chief Minister TR Zeliang-te chu hma la turin a lo ngen tawh a ni. State pahnih CM-te chuan hma an lak tur thu sawiin, Naga pawl hruaitute chu dawr an tiam a ni. Mahse United Naga Council (UNC)-te'n Manipur sorkar sawmna an pawm theih tak loh avangin a thara hma lak a ngai dawn niin a lang.