ULB Election: BJP-te'n Manifesto an tlangzarh

Nagaland State Bharatiya Janata Party (BJP) chuan Urban Local Body election atana an manifesto a tlangzarh.

Tlangzarh inkhawm hi Dimapur-ah neih a ni a, he hunah hian party hruaitu, candidate leh party mi leh sa ṭhahnem tak an pungkhawm a ni. He hunah hian campaign programme tlangzarh nghal a ni a, party tana campaign beihpui thlaktu tur team puan nghal a ni bawk. Manifesto-ah hian nitin mamawh a hnianghnar zawk theih nana hmalak te, faina, hriselna, zirna leh infrastructure lama nasa zawka hma lak an tum thu te an tarlang. Nagaland BJP president Visasolie Lhoungu chuan thu sawiin, party aiawha ding tura thlan chhuah te chu theihtawpa thlawp turin kalkhawm te a sawm a ni.

Hetih lai hian Nagaland Pradesh Congress Committee (NPCC) chuan state sorkar chu ULB election neih hun tur sawn hla turin an phut. NPCC president K Therie chuan, Congress party chu election hmachawn turin a inpeih tih a sawi a, mahse hmeichhe tana seat 33% hauhsak duhlohna lantira tribal pawl hrang hrangten nawrh an huaihawt avangin a hun sawn hla turin an phut tih a sawi. Inthlanna felfai leh boruak muanawm tak hnuaiah mipuiten vote an thlak theih nan inthlan hun sawn hlat a ngai a ni, a ti. Inthlanna felfai buatsaih chu democracy-in a kentel a ni, a ti bawk.

ULB election hi February 1-ah neih a ni ang. Hetih lai hian Tribal pawl hrang hrangte chuan an boycott tur thu an puang a, candidate-te chu inhnukdawk turin an ngen a, candidate eng emaw zat chu an inhnukdawk tawh a ni. ULB election neih turah hian state sorkar chuan hmeichhe tan seat 33% hauhsak turin thutlukna a siam a, hei hi tribal leh pawl eng emaw zat-te chuan an dodal a ni.