PM-in hmarchhak state pathumte duhsakna a hlan

Prime Minister Narendra Modi chuan hmarchhak sate pathum - Tripura, Manipur leh Meghalaya-te chu an state dinchampha phak pualin duhsakna a hlan.

Modi chuan Twitter kaltlangin duhsakna hi a hlan. Meghalaya mipuite chu hmasawnna kawnga an ṭhan chhoh zelna turah duhsakna hlanin, Tripura mipuite pawh duhsakna a hlan tih a tarlang. Tunlaia boruak nei lian tak Manipur pawh duhsakna hlanin, ram mipuiten hma an sawn zel theih a duhsak thu a sawi. Hmarchhak state pathum te hi January 21, 1972 khan, North-Eastern Areas (Re-organisation) Act, 1971 hnuaiah state-ah hlankai an ni a, kar kalta Inrinni khan an dinchampha phak hi lawm a ni.

Manipur-ah chuan Secretariat South Block conference hall-ah lawm a ni a, Manipur Chief Minister O Ibobi Singh chuan thu a sawi. Singh chuan, hel pawlte chetna chu hmasawnna daltu a ni a ti a, state mipuite ṭanruala do let a ngai tawh tak zet a ni, a ti. Sorkar laka helte chu danpawna awm an ni a, engti kawng zawng mahin pawm theih an ni lo, a ti. Manipur chu state dangte nena khaikhin chuan India rama state te ber zinga mi a nih thu sawiin, chutih laiin a hmasawnna chu chhuantham a tling niin, Ibobi Singh chuan a sawi.

Deputy Chief minister Gaikhangam pawhin thu sawiin, Prime Minister Indira Gandhi hun laia state pek a nih chinah nasa taka hma an sawn thu a sawi a, Manipur chuan hmabak eng tak a nei niin a sawi. Kum 2020-ah chuan Manipur chu 'Developed State'-ah puan a nih theih nan nasa taka hma lak mek a nih thu sawiin, sorkar laka helte chu hmasawnna daltu an ni, a ti.