Sorkar laipuiin Manipur chungchangah meeting ko leh

Sorkar laipui chuan Manipur-a chakkhai lamna kawngpui pawimawh, ni 80 chuang dan chahin a nghawngte thlirletin kar kalta Inrinni khan meeting a ko.

Meeting hi Home Minister Rajnath Singh chuan a kaihhruai a, Petroleum Minister Dharmendra Pradhan chuan buhfai leh oil lama Manipur dinhmun tlangpui a tarlang. Pradhan chuan, tun dinhmunah Manipur-ah hian buhfai, oil, gas leh thildang man te a sang hle tih sawiin, a black-a hralh chhuah a tam hle a ni, a ti. Kum 2016, November 1 aṭanga tiamchin awm lo a United Naga Council-te'n National Highway-2 (Imphal-Dimapur) leh NH-37 (Imphal-Jiribam)-te an dan chah chuan mipui nawlpui a nghawng na hle a ni, a ti.

NH-37 chu hawn a ni leh tawh a, dan pangngaiin lirthei tlantir a ni tawh. Hetihlai hian NH-2 chu danchah a la ni a, hawn thuai a nih theih nan Ministry of Home Affairs chuan hma a la leh mek. November 15, 2016 khan sorkar laipui hmalaknain New Delhi-ah 'tripartite talk' buatsaih a ni a, Manipur sorkar chuan sawmnna an dawng lo nia sawiin a palai a tir lo thung. Nikum December 22 khan Home Minister Rajnath Singh chuan chakkhai lamna kawngpui pawimawh NH pahnih dan chah chu India danpui kalh a ni tiin, Manipur Chief Minister O Ibobi Singh hnenah titawp thuai tura hma la turin a hriattir. Kawngpui dan tihtawp a nih mai loh avang leh, buainain ziaawm lam a pan mai loh avangin, kar kalta Ningani khan Manipur CM leh Nagaland CM-te chu Rajnath Singh hian New Delh-ah koin meeting a neihpui a, chak zawka hma la turin a ngen.

Home Minister chuan Manipur-ah hian central para millitary force tam zawk tirh luh a nih tur thu a sawi a, chuti chunga dan leh thupek kenkawh mumal theih a la nih loh fo chuan, sorkar laipui chuan ruahmanna dang a kalpui dawn tih Manipur CM a hrilh a ni. Meeting-ah hian minister leh sorkar mi pawimawh eng emaw zat an tel a, Union Home Secretary Rajiv Mehrishi chuan hmarchhak state hrang hrangte dinhmun tlangpui a tarlang bawk.