Assam-a inlambunna thlengah sipai pahnih thi

Assam-Arunachal Pradesh border-ah Pathianni khan inlam­bunna a thleng a, Assam Rifle mi leh sa pahnih an thih bakah, midang pakhatin hliam a tuar.

Police-te chuan inlambunna hi Jairampur bula thleng a nih thu an sawi a, United Liberation Front of Asom (ULFA) leh National Socialist Council of Nagaland - Khaplang (NSCN-K)-te chetna a nih an rin thu an sawi. Assam Director Gene­ral of Police Mukesh Sahay chuan security force-te chuan pawikhawihna thlenna an pan nghal tih sawiin, hel dap chhuah beihpui thlak nghal a ni, a ti. Tinsukia Superintendent of Police Mugdhajyoti Mahanta chuan Assam Rifle lambuntute hi mi 15 aṭanga 20 vel an nih thu a sawi. Helte hian silai leh a mu ṭhahnem tak an tlanchhiatsan a ni. Nikum November thla khan ULFA leh NSCN-K-te hian Tinsukia district-ah sispai an lo lambun tawh a, hemi ṭum hian sipai pathum an thih bakah, midang eng emaw zatin hliam an tuar a ni. Hetih lai hian hel pawl pahnihte hian inlambunna thleng chu an tih a nih thu an la puang lo a, an inrawlh ngei em tih finfiahna a la awm lo a ni.

Assam Chief Minister Sar­bananda Sonowal chuan inlam­bunna thleng leh ta chu pawi a tih thu sawiin, thi chhungte a tawrhpui tak zet tih a sawi. "Helte chet dan hi mi dawihzep te thil tih dan a ni, eirukna leh hel pawlte chetna chu kan do zel ang" a ti. Sorkar laipui leh state sorkar hmalaknain helte nuai chimit turin hma lak a ni zel ang, a ti bawk. Director General of Police (DGP) Mukesh Sahay pawhin helte do let an nih zel tur thu sawiin, ram hmelma dik tak an ni, a ti.

Arunachal Pradesh Chief Minister Pema Khandu pawhin Assam Rifle-te lambun an ni leh ta chu a dem thu a sawi. Ram chhan nana nun hlantute chu mi huaisente an nih thu sawiin, an kalsan tak an chhungte a tawrhpui tak zet tih a sawi. Assam Rifle-te chu hmarchhak mite ṭhian ṭha leh, mipuite himna tura rim taka thawk ṭhin an ni a ti a, nunna chan chhungte hnenah Chief Minister Relief Fund aṭanga zángnadawmna sum pek an nih tur thu a sawi bawk. Sipai thi zinga pakhat Khamtai Wangsu hi Arunachal Pradesh mi a ni a, thi pakhat leh hliam tuar pakhat te hi Manipur lam ni nia tarlan an ni bawk.

Pathianni vek khan Manipur-a Imphal West district-ah National Socialist Council of Nagaland - Isak-Muivah (NSCN-IM) mi leh sa man an ni a, an kut aṭangin puak thei thil ṭhahnem tak man a ni. Puak thei thil an man te hi gelatin (40) leh hmanraw dang eng emaw zat a tel a, air gun 18 man tel a ni bawk. Heng mite hi Khongsang bazar pana an tlan laiin National Higway-37-ah man an ni. An vai hian Patsoi police station-ah dah an ni a, NH-37 (Imphal-Jiribam)-a security duty-te beih tuma che chhuak niin police-te chuan an sawi.