Mithiamten Hmarchhak leimin chungchang an zirchiang

India, Italy leh Britain-a mithiam thlanchhuah te chuan Darjeeling, East Sikkim leh Nilgiris-a leimin ṭhin an zirchiang.

Leimin zirchianna project hi ‘LANDSLIP’ tih vuah a ni a, UK, Italy leh India rama physical scientist, engineer leh social scientist-te chu member an ni. British Geological Survey (BGS)-a an hotu Helen Reeves chuan a ho a, member dangte hi King College London (KCL), Amrita University, Consiglio Nazionale delle Ricerche (Research Institute for Geo-Hydrological Protection), Geological Survey of India (GSI), Newcastle University, UK Met Office, Practical Action Consulting India leh Practical Action Consulting UK-a mi te an ni.

Project atan hian UK Na­tural Environment Research Council (NERC), Depart­ment for International Development (DFID) Science for Humanitarian Emergencies leh Resilience (SHEAR)-te chuan sum an thawh a, hmarchhak mai bakah India ram chhunga leimin thlen nasatna hmun te an zirchiang dawn a ni. Helen Reeves chuan, zirchianna hian leimin thleng ṭhin venna kawngah nasa taka a puih theih an beisei thu sawiin, a bikin hmarchhakin leimin avanga harsatna nasa tak a tawh ṭhin chu a sutkian theihna beisei thu a sawi.

Team-te hian a vawikhat­na atan kar kalta Zirtawpni khan Darjeeling leh Sikkim-a leimin thlenna ṭhin hmun te an tlawh a, zirchianna an nei nghal a ni.