Manipur Assembly Election : BJP-in candidate tur thenkhat puang

Manipur assembly election chu March 4 leh 8-ah neih a ni dawn a, Bharatiya Janata Party (BJP) chuan Thawhṭanni khan an candidate turte hming ṭhenkhat a puang.

BJP chuan candidate tur hming 31 a puang phawt a, an zingah hian hmeichhia an awm rih lo. Candidate tura hming puan tawh zingah hian Congress Minister hlui N Biren Singh, Yumkham Erabot Singh leh Francis Ngajokpa-te pawh an tel a, anni bakah hian Congress MLA hlui Dr Kh Loken leh Z Kikhonbou Newmai, Congressparty hruaitu hlun Dr S Ranjan-te pawh an tel a ni. Manipur-ah hian Muslim 6% vel an awm a, candidate tura hming puan ṭum khatnaah hian Muslim sakhaw zuitu Md Anwar Hussain pawh telh a ni. BJP thuchhuah chuan candidate 29 dang te chu January 27-ah official-a puan leh tur a nih thu an sawi.

Hetih lai hian rorel lai Congress party chuan assembly seat 60 chuh turah hian canddiate-te hming an la puang chhuak lo. Chief minister ni lai O Ibobi Singh chuan a dinna bial ngai Thoubal constituency-ah a chuh leh dawn nia sawi a ni a, a nupui L. Landhoni Devi chu Khangabok Constituency aṭangin a zawna ṭum hnih thlan tlin a ni tawh a, a ni pawh hian a chuh ve leh ngei rin a ni. Hetih lai hian Manipur 'Iron Lady' Irom Sharmila Chanu-i chuan, O Ibobi Singh hi Thoubal constituency-ah a khing dawn a, he bial hian ngaihven a hlawh phah hle. Sharmila-i hian kum 2016 October thla khan party thar, People’s Resurgence and Justice Alliance (PRJA) a din a, state assembly election-ah hian an chuh tur thu an puang tawh. PRJA dintu Sharmila-i chuan Thoubal constituency bakah, Khurai constituency-ah te a chuh tur thu a lo puang tawh a ni.

Manipur assembly election-ah hian rorel lai Congress paty leh BJP chu inkhingtawk ber tura ngaih leh thawm nei lian ber an ni. Central-a BJP hruaitu ṭhekhatte chuan Manipur-ah hian Congress party tel lohna sorkar an din tur thu an lo sawi tawh a, kum 15 zet ro rel tawh Congress party chu paihthlakin a awm dawn niin an sawi. BJP hian ngawrh takin campaign an kalpui tawh a, sorkar laipuia minister eng emaw zatin Manipur an tlawh tawh a, hmun hrang hrangah campaign beihpui an thlak mek a ni.

Hetih lai hian Congress party chuan thawm an la nei ring tawk lo hle. A bikin tribal-te chuan Congress kaihhruai sorkar an dodal nasa hle a, state assembly-in kum 2015-a anti-tribal bill pathum a pass hnuah dodalna a nasa zual hle. Kum 2016 kum tawp lam khan state sorkar chuan Jiribal leh Sadar Hills-te chu district-ah hlankai a nih tur thu am puang a, hei hi Manipur-a Naga-te chuan duh loin nasa takin sorkar hmalakna sut leh turin an kar mek. Dodalna nasa tak a tawh mek lai hian, state sorkar chuan December 2016 khan district thar pasarih a din a, hei hian boaruak a tisosang zual hle bawk.

Congress party chhungah pawh buaina a awm mek a, MLA ni lai eng emaw zat chuan an nihna hlipin party an chhuahsan a ni. Party chhuahsan zingah hian tribal an tam ber a, bial mipuite nawrna avanga party chhuahsan an awm nual bawk. A bikin tribal mipuite chuan an MLA-te chu, state cabinet-in anti-tribal bill pathum a pass hnuah bang turin nasa takin an nawr a, MLA eng emaw zat an ban phah a ni. Congress aṭanga chhuakte hian party dang an zawm tlangpui a, BJP-in candidate tur hming a puanchhuah hmasak zingah pawh, Congress sorkar-a minister leh MLA hlui eng emaw zat an tel.