Sorkarin Naga buaina chinfel a duh tak tak lo : Nagaland Congress chief

Nagaland Congress president K Therie chuan Naga political issue chungchangah state sorkar chu na takin a sawisel.

K Therie chuan Nagaland-a NDPP kaihhruai eptu awm lohna sorkar chuan Naga buaina hi chinfel a duh tak tak lo a ni tiin, "Buaina chinfel duh lo sorkar kan lo thlang a ni," a ti.

Naga national worker-ten an buaina chu tihfel thuai an duh tawh takzet laiin, state sorkar erawh chuan hei hi a tum lo a ni tiin Congress hruaitu chuan a sawi. Naga buaina chinfel thuai a nih theihna tura lungrual taka chak zawka hma an lak theihna turin, Nagaland-a political party hrang hrang chuan state sorkar hi thlawpin, eptu party awm lohna sorkar a ding mek a ni.

Naga pawl pahnihnen inremna an lo ziah tawh chu state sorkar chuan tun thlengin a la pawmsak lo niin Therie chuan a sawi. Sorkar laipui chuan inremna kawng zawngin National Socialist Council of Nagaland - Isak-Muivah (NSCN-IM) leh Naga National Political Groups (NNPG)-te chu a hran ve vein inbiakna a neihpui mek a ni. NSCN-IM nen hian kum 1997 aṭangin inbiakna hi neih ṭan a ni a, NNPG nen hian kum 2017 khan an inbe ṭan bawk. Kum 2015, August 3 khan sorkar laipui chuan NSCN-IM nen 'framework agreement' an ziak a, kum 2017, November 17-ah NNPC nen 'Agreed Position' an ziak leh bawk.

Kumin April 19 khan sorkar laipuiin Naga peace talk-a palai atana a ruat, AK Mishra chu Nagaland-ah kalin, Camp Hebron-ah NSCN-IM general secretary Thuingaleng Muivah nen an inbia. Hei hi Naga peace talk kalpui a nih hnuah NSCN-IM headquarters-a inbiakna an neih ṭum khatna a ni.