Bawng lakluh kawngah harsatna awm lohna atan hma kan la : Meghalaya Minister

Assam sorkarin bawng humhalhna dan an hman tak avangin Meghalaya chuan Assam kaltlanga bawng lakluh kawngah harsatna an tawk mek a, heng harsatnate hi chingfel turin Meghalaya sorkar chuan hma a la mek tih minister in-charge animal husbandry and veterinatary department Sanbor Shullai chuan a sawi.

State chhunga bawng talh leh bawngsa zuartu pawlte chuan bawng lakluh kawnga harsatna an tawh thu leh, bawngsa indaih lohna thleng mek chungchangah sorkarah complaint hi eng emaw zat an thehlut tawh a ni.

Minister Shullai chuan complaint lutte hi chhangin, Assam chief minister leh AH&Vety department hnenah pawh lehkha an thawn tawh thu leh, state dang aṭanga Assam kaltlanga bawng lakluh kawnga harsatna awmte tihtawp a nih theihna atana inrawlh tura an ngen thu a sawi. Bawng lakluh dan tur chungchangah Assam official-te nen pawh ṭum eng emaw zat meeting an nei tih a sawi bawk.

Shullai chuan department chuan state pawn aṭanga bawng lalut thei tur hian transit permit a pekchhuah thu leh, permit hi 370 pek chhuah an ni tawh thu a sawi. Sorkarin permit a pekte hian bawng phurhluhna kawnga harsatna an tawk a nih chuan thuneitute hriattir thuai turin a ngen bawk a ni.