Assam - Manipur Highway-ah inlambunna a thleng leh

Manipur police-te chuan Thawhlehni khan Assam leh Manipur inkara National High­way-ah hel tu tih hriat lohte chuan truck leh oil tanker eng emaw zat an lambun leh tih an sawi.

Inlambunna hi NH-37-a Khongkhang bula thleng a ni a, security force leh hel te chu hun eng emaw chen an inkap a, thi leh hliam an awm hriat a ni lo. Tun hnai khan Central Reserve Police Force-te venhimna hnuaiah truck leh oil tanker 300 vel zet chuan Assam aṭangin Manipur an pan a, kawng lakah lambun an ni leh ta a ni. Helte hian hmun fianrial leh kawng chhe laiah lirthei te hi an lo lambun a, oil phur tanker pakhat chu kah fuh niin a oil phurh a baw nasa hle nia tarlan a ni.

He thil thlenna hmunah hian security force tam zawk tirh niin, hel dap chhuah hna an thawk nghal. Nikum November 1 aṭanga tiamchin awm loa United Naga Council (UNC)-te'n NH an danchah hnua inlambunna a thleng fo a ni. Imphal leh Moreh inkara Trans Asian Highway-a inlambunna thlengah pawh mi eng emaw zatin hliam an lo tuar tawh bawk. Inlambunna thleng ṭhinah hian tun thlengin pawikhawihtute man an la awm lo a, eng pawl mahin an tih a nih thu an la chhal lo bawk. Hetih lai hian police-te chuan inlambunna thleng hi Naga hel pawl, National Socialist Council of Nagaland - Isak-Muivah (NSCN-IM)-te chetna a nih an rin thu an sawi.

Manipur sorkar chuan state chhungah dan leh thupek khauh zawka kenkawh a nih theih nan sorkar laipui chu central paramilitary force company 60 tir lut turin a ngen a, company 29 tirh luh an ni tawh. Tun hnai khan Union Home Minister Rajnath Singh chuan Manipur-ah hian central paramilitary force tam zawk tirhluh a nih tur thu a sawi a, Manipur buaina chingfel tura remna zawnga inbiakna neih a nih theih nan Manipur chief minister Okram Ibobi Singh leh Nagaland chief minister TR Zeliang-te chu hma la turin a lo ngen tawh bawk.

Hetihlai hian Petroleum Minister Dharmendra Pradhan chuan, Manipur mipuite harsatna phuhru turin oil phur truck 100 tirhluh an nih tur thu Thawhlehni khan a sawi. Pradhan chuan thuthar thehdarhtute kawmin, sorkar laipui hmalaknain Guwa­hati aṭangin Imphal-ah oil eng emaw zat chu Army C17 aircraft hmangin phurhluh a ni, a ti.

Manipur-ah hian UNC-te chuan ni 80 chuang NH an danchah tawh avangin oil leh nitin mamawh lakkhawm kawng­ah harsatna a thleng mek a ni. Sorkar laipui hmalaknain thil chi hrang hrang tonne 35 vel zet chu Indian Airforce C-17 Globemaster thlawhtheihna hmangin thawnluh a ni tawh a, thawnluh belh zel tura ruahman a ni. Tun hnai khan Union Home Minister Rajnath Singh-a kaihhruainain inter-ministerial meeting neih a ni a, Petroleum Minister Dharmendra Pradhan chuan Manipur-in harsatna a tawh mek dan chipchiar a tarlang. Meeting-ah hian Election Commission-in Manipur-a March 4 leh 8-a assembly eletion neih tura a ruahman chungchang sawiho a ni bawk.