ULB Election : JCC-te'n Bandh huaihawt-ah sorkar vau

Nagaland-a tribal pawl hrang hrang inzawm­khawm Joint Coordina­tion Committee (JCC) chuan, state sorkarin Urban Local Body (ULB) elec­tion neih hun tur a sawn hla lo a nih chuan bandh an huaihawt tur thu an sawi.

JCC thuchhuah chuan, February 1-a ULB election neih tura hmei­chhe tana seat 33% hauhsak chu an duh lo tih sawiin, sorkar chu thutlukna a lo siam tawh sut leh tur leh, inthlan hun tura ruat pawh sawn hla turin an phut tih an sawi. An ngenna state sorkarin a ngaihpawimawh lo a, February 1-ah inthlan buatsaih a nih chuan bandh huaihawt a nih tur thu an sawi. JCC-ah hian Naga Council Dimapur, Central Nagaland Tribes Council leh tribal pawl eng emaw zat an tel a, Thawhṭanni khan kawngzawh huaihawtin, Chief Minister TR Zeliang-a hnenah an thil phut hrang hrangte thlenin, memorandum an thehlut a ni.

Hetih lai hian Naga Mothers Association-te chuan, ULB election neih turah hian hmeichhe tana seat 33% hauhsak an nih theih nan Supreme Court-ah an lo zualko tawh a ni. State sorkar chuan kum 2016 khan, ULB election neih turah hian hmeichhe tana seat 33% hauhsak turin thutlukna a lo siam tawh bawk a, hei hi tribal pawl hrang hrangte chuan duh loin, sorkar chu thutlukna a lo siam tawh sut leh turin nasa takin an kar a ni.

Hetih lai hian CM TR Zeliang chuan Naga mipuite chuan hmeichhe tana seat hauhsak chungchangah an rilru puthmang an thlak a ngai niin a sawi. "Tribal pawl hrang hrangte hian Municipal Act hi siamṭhat an duh em ni, engtianga siam ṭhatnge an duh? Dan hi chuti maia siamṭhat theih leh khawih danglam zung zung theih a ni lo" tiin a sawi. Hmeichhe tan seat hauhsak chu dan ang thlapa kalpui a nih thu sawiin, mipuite chu sorkar thutlukna pawm tur leh, an rilru put hmang thlak tura a duh thu a sawi.

Nagaland State Elec­tion Commission pawhin ULB election neih hun tura ruat chu tribal-te nawrna avang sawn hlat ngawt theih a nih loh thu an sawi ve bawk.