APSC Scam: Assam Police-te'n thubuai ziaklut

Assam police-te chuan Thawhlehni khan Assam Public Service Commission (APSC) hnuaia thamna sum lak chungchangah thubuai an ziaklut.

Chargesheet hi phek 19 zet a ni a, thubuai 10 ziahluh a ni. Chargesheet-ah tarlan zingah APSC chairman Rakesh Paul chu a langsar hle a, a ni bakah hian APSC member dang Samedur Rahman, Basanta Doley, Naba Kumar Patir, Mabud Ali Choudhury, Abbas Ali Ahmed, Syed Musaraff Husain leh Assistant Contro­ller of Examination Pabitra Koibarta-te hming pawh ziah lan a ni. APSC member-te hi Section 7/13 of the Prevention of Corruption Act, IPC Sections 120B, 420, 468, 471, 477A leh 201 tlawhchhanin thubuai siam­sak an ni. APSC chairman Paul-a unaupa Rajib Paul leh he thila inhnamhnawih zinga sawi Sudip Das-te chu section 12 of the Prevention of Corruption Act, IPC Sections 120B, 420, 468, 471 leh 201 behchhanin thiam loh chantir an ni bawk.

Hetih lai hian Dibrugarh Police-te'n an chhui zinga mi Mrigen Saikia leh Mafizul Islam-te chu court chuan thiam a chantir. Police-te chuan hnuchhui hna chu fimkhur tak leh ngawrh taka kalpui a nih thu an sawi. Kum 2016 kum tawp lam khan Assam Public Service Commission (APSC) hnuaia hnalak chungchangah hian buaina a irh chhuak ṭan a, APSC chairman leh member dangte chu thamna sum laah puh an ni. He thil thleng hi chhui chian nghal a ni a, APSC member eng emaw zat chu man niin, thu zawh fiah an ni. APSC office dap a nih bakah, document pawimawh ṭhahnem tak lakkhawm a ni bawk.

APSC chairman Paul chu suspend a ni a, amah thlak tu tur pawh ruat lailawk a ni. He thubuai kal zelah hian APSC member bakah, MLA leh Paul-a laina hnaite hming pawh lam rik a ni. Tunkar Thawhlehni khan APSC hnuaia hnalaka thamna sum lak chungchangah hian Assam police-te chuan thubuai 10 ziah luh a nih thu hi an puang ta a ni.