Remna zawnga inbiakna nei turin kan inpeih : Manipur CM

Manipur Chief Minister Okram Ibobi Singh chuan, sorkar laipui leh United Naga Council (UNC)-te New Delhi-a inbiakna neihpui turin Manipur sorkar a inpeih tih a sawi.

CM Ibobi Singh chuan, UNC-te'n tiamchin awm loa National Highway an dan chah mek tihtawp a nih theih nana inbiakna nei turin state sorkar a inpeih tawh a ni, a ti. Remna zawnga inbiakna nei tur hian UNC hruaitute chu dawr thuiai an nih tur thu sawiin, a hun leh nih tur puan thuai an beisei tih a sawi. Republic Day hman zawh a nih hunah UNC hruaitute chu dawr an tum thu sawiin, boruak ṭha tak hnuaiah inbiakna neih theih beisei a ni, a ti. Ibobi Singh hian Thawhlehni khan CM Secretariat-ah thuthar thehdarhtute a kawm a, heng thu hi a sawi a ni.

Ibobi Singh chuan, remna zawnga inbiakna neih tur hi Union Home Minister Rajnath Singh-a'n a kaihhruai an remtih thu sawiin, Union Home Secretary-in a kaihruai a nih chuan, State Chief Secretary emaw Additional Chief Secretary (Home) an tirh tur thu a sawi. Sorkar laipui hmalaknain nikum khan New Delhi-ah inbiakna hi neih a lo ni tawh a, hemi ṭum hian Manipur sorkar chuan palai a tir lo thung. Union Home Minister Rajnath Singh chuan Manipur CM leh Nagaland CM-te chu New Delhi-ah koin, inbiakna neih a nih leh theih nana hma la turin a ngen.

Hemi hnu hian Manipur sorkar chuan Imphal-ah inbiakna nei turin ruahmanna a siam a, hei hi UNC-te chuan an pawm lo thung. UNC-te chuan Imphal-a inbiakna neih chu a him tawk lo nia sawiin, Naga-te chenna ram chhung­ah emaw New Delhi-ah emaw inbiakna neih an phut. Manipur sorkar chuan a ruahmanna a hlawhtlin tak loh avangin ruahmanna dang a siam a, UNC-te rawtna anga New Delhi-ah inbiakna neih a remtih thu a sawi ve leh ta a ni.

CM chuan, tun din­hmunah nitin ma­mawh lakkhawm kawngah harsatna an la tawh reng thu sawiin, NH-2 hawn ni tawh mah se NH-37 (Imphal-Jiribam) dan chah a la nih avangin nunphung a la khaihlak hle a ni, a ti. Tiamchin awm loa NH dan chah tihtawp thuai a nih loh chungchangah Narendra Modi-a kaihhruai sorkar chu Manipur mipuite harsatna hriatthiampui duh lo leh, hma la chak tawk loah a puh a. BJP ni loin, Congress party chu sorkarna siam leh tur an nih thu a sawi bawk.

Hetih lai hian Chief of Army Staff General Bipin Rawat chuan Nilaini khan Manipur a tlawh a, sorkar mi pawimawhte meeting a neihpui. General hian Manipur buaina chungchangah Governor Dr Najma Heptulla pawh inbiakna a neihpui a ni. GOC-in-C Eastern Command Lt Gen Praveen Bakshi leh GOC-in-C 3 Corps Lt Gen Anil Chauhan-te chuan General Bipin Rawat hi an ṭawiawm.