PA Sangma hnenah Civil chawimawina sang hlan

India rama civil mite chawimawina sang ber dawttu 'Padma Vibhushan' chu Lok Sabha Speaker hlui Purno Agitok Sangma hnenah hlan a ni.

PA Sangma hi Meghalaya aṭanga he chawimawina dawng thei awmchhun a ni a, amah hi a boral tawh. A hunlaia Lok Sabha Speaker ni thei a ni a, amah hi tribal a ni. Award hi Sangma nupui Soradini K.Sangma kutah hlan a ni. K.Sangma chuan civil chawimawina sang a pasalin a dawng chu ropui a tih thu sawiin, amah awm tawh lo mah se an chhungkua an lawm tak zet tih a sawi. Prime Minister Narendra Modi leh selection committee-te chungah lawmthu a sawi bawk.

Sangma-a fapa, MP ni lai Conrad K Sangma chuan, "Ka pa khan ram mipuite a hmangaih tak zet a, a bik takin Garo hills mipuite chu a ngaina zual hle a ni. Mipuite tana a theihna zawng zawng hmang raltu a ni a, chu chu mipuite pawhin hriaiin an aiawha roreltu ni turin vawi eng emaw zat an thlang chhuak a ni" tiin, a pain mipuite tan hna a lo thawh ṭhin tawh te a tarlang. Padma Vibhushan hi midangte tana a hnathawh ṭhat avangte, ram tana a hnathawh ṭhat te avanga Sangma hi hlan a nih thu tarlan a ni.

Padma Shri lo dawng tawh Patricia Mukhim chuan Sangma chungchang sawiin, India ram leh state sorkar tana a hnathawh zo zai chu theihnghih theih a ni lo a ni tiin, Lok Shaba Speaker ṭha berte zing a mi a ni a, Meghalaya tan chauh ni lo hmarchhak tana mi chhuanawm tak a ni, a ti.

PA Sangma hi 1 Septem­ber, 1947 khan Meghalaya, West Garo Hills distric-a Chapathi khuaah a piang a, kum 1996-1998 chhung Lok Sabha Speaker niin, tribal zinga he dinhmun chelh theih hmasa ber a ni. Atal Bihari Vajpayee, H.D. Deve Gowda leh I.K. Gujral-te hun laiin sorkar laipuiah nihna pawimawh tak tak a chelh bawk. Politics a luhchilh hma hian lecturer, lawyer leh journalist a ni ṭhin a, kum 1988 -1990 khan Meghalaya Chief Minister nihna a lo chelh tawh bawk. Kum 1999 khan Congress party chhuah­sanin, Nationalist Congress Party a din a, kum 2013 khan National People’s Party a din leh bawk.

Purno Agitok Sangma hi kum 2016 March 4 khan New Delhi-ah heart attack avangin a boral a ni.