Assam sorkarin National Dairy Board inremna ziahpui

Assam sorkar chuan state chhunga bawnghnute tam zawk tharchhuah theihna tura thawhpui turin National Dairy Development Board (NDDB) chu Nilaini khan memoradum of understanding (MoU) a ziahpui.

Inremna an siamah hian NDDB hian Jorhat-a East Assam Milk Producers’ Cooperative Union Ltd chu kum nga chhung a enkawl dawn a ni.

Assam chief minister Himanta Biswa Sarma chuan MoU hi Assam-a khawchhak lam district-a bawng vulhten an hlawkpui dawn hle tih sawiin, state chhunga ni khata bawnghnute tharchhuah chu litre maktaduai khata tlin tir theih an tum tih a sawi.

Hmarchhak state-a milk cooperative union hrang hrangten Guwahati-a a ṭum khatna atana North East Dairy Cooperative Conclave 2022 an neihah khan CM Sarma hian thu sawiin, NDDB enkawl tura East Assam Milk Producers’ Cooperative Union Limited dah chu coopertive-te ṭana a ṭhat a beisei thu a lo sawi. Sarma chuan, "Kum 2008 khan Purabi Dairy enkawl hna chu NDDB kutah hlan a lo ni tawh a, hei vang hian West Assam Milk Producers’ Cooperative Union tluchhe mai tur pawh chhanhim a ni thei a ni. Hetiang bawk hian tun ṭuma NDDB an thawhpui leh tur chuan Assam khawchhak lama bawngvulhtu pawl tan hmasawnna nasa tak a thlen ngei a ring tih a sawi.