Meghalaya Governor a bang

Meghalaya Governor V. Shanmuganathan chuan Ningani khan President Pranab Mukherjee henah ban dilna a thehlut.

Shanmuganathan hi Raj Bhavan-ah nungchang mawi lo leh khawsak dan mawi lo takin a che ṭhin nia sawi a ni. Mahse hei hi Governor chuan a dik lo tih sawiin, a ban chhan chu dik lo taka an puhna chak zawka chhui a nih theih nana banna thehlut a nih thu a sawi. Governor chuan a banna hi President Pranab Mukherjee henah a thehlut tih, Prime Minister Office chuan a tarlang. Nilaini khan Raj Bhavan staff-te chuan Prime Minister Office-ah an lungawi loh thu inziahna phek li zet chu an thawn a, he tah hian staff 100 vel zetin hming an ziak a ni. Lekhaah hian Governor chuan Raj Bhavan chu 'Young Ladies Club'-ah a chhuah niin an sawi a, bang tura an phut thu an sawi.

Raj Bhavan staff-te chuan, Raj Bhavan chu zahawm taka vawn a nih loh thu sawiin, Governor chu hawihhawm lo, invaivung leh mawi lo taka che ṭhinah an puh. A nungchang mawi loh thu te, staff-te chunga a chet dan te, Raj Bhavan zahawmna venhim kawnga a hlawhchham zia te, Prime Minister Office-ah hian an thlen a ni. Governor hian Public Relation Officer atana interview zinga hmeiche pakhat chu Raj Bhavan chhungah kuahin, zahpuiawm takina che niin an sawi a, he nula hui nikum December 8 khan mimal takin a ko niin an sawi bawk.

Hetihlai hian Civil Society Women’s Organisation, Thma U Rangli leh pawl ṭhenkhat chuan Governor banna hi pawmsak lo tur leh, dahlet leh a nih theih nan signature campaign an kalpui. Republic Day lawmni khan, rights activist Angela Rangad leh pawl ṭhenkhat te chu Raj Bhavan tualah an pungkhawm a, Gover­nor banna chu pawmsak turin an nawr ve thung. Chief Minis­ter Mukul Sangma chuan thuthar­thehdarhtute kawmin, Governor chungchang chu Ministry of Home Affairs-ah leh Prime Minister Narendra Modi hnenah an thlen tur thu a sawi a, sorkar laipui thutlukna ngaihchan a ni ang, a ti.

Congress party chuan an state Governor V Shanmuganathan ban dilna pawmsak tura an phut thu an lo sawi ve mek bawk. State Congress thupuangtu Tom Vadakkan chuan, "Shanmuga­nathan hi India danpui zahawmna humhim zo lo leh palzuttu a ni a, a banna hi pawmsak ngei turin President kan phut a ni" a ti. Governor hi Raj Bhawan-a a thawhpuiten an hrechiang em em a, ban tura sorkar laipuia rawtna an thlen hi a awm hle a ni, a tibawk. Janata Dal United (JD-U) pawhin Governor banna chu pawmsak tura an phut thu an sawi. JDU thupuangtu K.C. Tyagi chuan, Shanmuganathan chet dan hi a demawm tak zet a, tun hnuah a thlen nawn tawh lohna turin Governor banna hi pawmsak a, sorkara nihna pawimawh a neihte pawh hlih sak vek turin an party chuan an phut tih a sawi.

Shanmuganathan hi kum 68 a ni tawh a, Tamil Nadu lam chhuak a ni. May 20, 2015 khan Meghalaya Governor atan hian lakluh a ni. Meghalaya bakah hian, Arunachal Pradesh Governor J. P. Rajkhowa chu ban a nih avangin, September 16, 2016 khan Arunachal Pradesh Governor nihna chelh kawp tir a ni a, September 2015 - August 2016 chhung khan Manipur Governor in-charge atan ruat a ni bawk.