Sikkim-ah Covid-19 kai 8 awm belh

Sikkim-ah Pathianni zan khan hri kai pariat hmuh belh an ni a, anni nen hian Covid-19 kai hmuh hi mi 78 an tling tawh a ni. 

Hri kai hmuh tawh zinga mi 25 enkawl dam ni tawhin, damdawiin aṭangin chhuah tir an ni tawh. Enkawl mek zingah hian napuang kum hnih mi pawh a la tel tih health director general Dr Pempa Tshering Bhutia chuan a sawi. Naupang positive enkawltu nu erawh chu a negative tawh avangin chhuah tir a ni tawh a, nu pakhat dang positive thoin a enkawl leh mek a ni. 

Pathiannia hri kai hmuh mi pariat zinga pali chu East Sikkim-a Paljor Namgyal Girls Senior Secondary School quarantine facility-a awm an ni a, a dang pali chu South Sikkim-a IHCAE Chemchey quarantine facility-a awm an ni. An zinga pathum chu tunhnaia Bihar aṭanga rawn haw niin pakhat chu Siliguri aṭang haw a ni bawk. 

Dr Bhutia chuan Pathianni khan hmun dang aṭanga haw mi 91 an awm tih sawiin, tangkhang haw hi an tlem ṭan tawh tih a sawi. Hei vang hian hri kai hmuh belh pawh an tlem chhoh zel beisei a nih thu sawiin, damdawi  hmanruate pawh an ngah tawk tih a sawi.