Assam leh Nagaland Governor-te'n AP leh Meghalaya hmui dawn

Guwahati High Court Chief Justice Ajit Singh chuan Nagaland Governor Padmanabha Balakrishna Acharya chu, kar kalta Inrinni khan Arunachal Pradesh acting Governor atan Raj Bhavan-ah a lalut. Hemi rual hian Assam Governor Banwarilal Purohit pawh, Meghalaya Governor lailawk atan lakluh a ni.

AP Governor lailawk lakluhna inkhawmah hian Arunachal Pradesh Chief Minister Pema Khandu, council of minister leh state assembly member bakah, Chief Secretary in-charge Satya Gopal leh sorkar mipawimawh eng emaw zat an tel. Meghalaya leh Aruanchal Governor nihna chelh kawptu, Governor V Shanmuganathan chuan nungchang mawi lo leh Raj Bhavan zahawmna tibawrhbang zawnga chea puh a nih avangin, president hnenah kar kalta Ningani khan banna a lo thehlut tawh a ni.

Shillong-a Raj Bhavan staff 100 vel zet chu an Governor chung­changah hian Prime Minister Office leh Rashtrapati Bhavan-ah an zualko a, Governor ban tura phutna lehkha ziakin an lo thehlut a ni. Hemi hnu hian V Shanmuganathan chuan President Pranab Mukherjee hnenah banna a thehlut zui a ni. Kar kalta Zirtawpni khan President Pranab Mukherjee chuan Meghalaya leh Anurachal Pradesh Governor nihna chelh kawptu, V Shanmuganathan-a banna hi a pawm sak.

Assam Governor Banwarilal Purohit chu Meghalaya Governor lailawk atan ruat a ni bawk. Asssam Governor Banwarilal Purohit hi kar kalta Inrinni vek khan Meghalaya High Court Chief Justice Dinesh Maheshwari chuan rinawmna thu tiamtirin a lalut. Purohit chuan Governor kal chhuak ta V. Shanmuganathan chungchang chu a hriatpui loh thu sawiin, banna a thehlut tih pawh media kaltlanga a hriat chauh thu a sawi. A chungchang chu dan hmanga chinfel tur a ni, a ti. Meghalaya Chief Minister Mukul Sangma pawhin V. Shanmuganathan chung­changah state sorkar chuan thuneih­na a neih loh thu leh, sorkar laipui thutlukna an ngaihchan thu a sawi.

Hetih lai hian central-a eptu party-te chuan Meghalaya Gover­nor chungchangah hian thawm an rawn nei ve nghal a, a lakah thubuai ziahluh an phut. Eptu party lian ber Congress chuan V Shanmuganathan lakah hian thubuai ziahluh an phut thu an sawi. An party thupuangtu Kapil Sibal chuan, Meghalaya Governor bang ta chet dan chu ngawih bopui mai chi a nih loh thu sawiin, thil chiang zawk hre tura thubuai ziahluh an phut thu an sawi. Hemi chungchangah hian Prime Minister pawh hma la tura an phut thu a sawi bawk. Congress party bakah hian RSS leh eptu party dangte chuan Governor ban ta lakah hian FIR thehluh an phut.

Meghalaya Governor V. Shan­mu­ganathan hi Raj Bhavan-ah nungchang mawi lo leh khawsak dan mawi lo takin a che ṭhin nia sawi a ni. Mahse hei hi Governor chuan a dik lo tih a lo sawi tawh. Governor hian Public Relation Officer atana interview zinga hmeiche pakhat chu Raj Bhavan chhungah mawi lo takin a khawsakpui nia sawi a ni a, he nula hi nikum December 8 khan mimal takin a office-ah a lo ko tawh niin an sawi bawk. Congress party leh Janata Dal United (JD-U)-te chuan Governor banna hi pawmsak tura an phut thu an lo sawi tawh a, Governor chetdan chu an dem tak zet tih an sawi.

Shanmuganathan hi kum 68 a ni tawh a, Tamil Nadu lam chhuak a ni. May 20, 2015 khan Meghalaya Governor atan hian lakluh a ni. Meghalaya bakah hian, Arunachal Pradesh Governor J. P. Rajkhowa chu ban a nih avangin, September 16, 2016 khan Arunachal Pradesh Governor nihna chelh kawp tir a ni a, September 2015 - August 2016 chhung khan Manipur Governor in-charge atan ruat a ni bawk.