Nagaland-a tribal pawl hrang hrangte chuan kar kalta Inrinni khan bandh an huaihawt a, nun­phung a khaihlak nasa hle. 
Bandh hi district hrang hrangah kalpui a ni a, buaina liantham chhuak a awm hriat a ni lo. Urban Local Body (ULB) election neih tura hmeichhiate tana seat 33% hauhsak duhlohna lantir hian, January 30 leh February 1-ah te bandh hi chunzawm leh a nih tur thu a huaihawttute chuan an sawi. State sorkar chuan Nagaland Municipal Act behchhanin ULB election neih turah hian hmeichhe tan seat 33% hauhsak turin thutlukna a siam a, hei hi tribal-te chuan nasa takin an dodal a ni. 
Nagaland khawpui Kohima-ah chuan bandh hian thlawp a hlawh ṭha hle a, lirthei che vel hmuh tur a awm meuh lo. Kohima district-ah hian Angami Public Organization (APO)-te chuan nimin thleng khan bandh hi an kalpui a, Angami Youth Organisation (AYO), NAYO, CYO, SAYO leh WAYO-te chuan an thlawp a ni. Dimapur-ah chuan bandh hi khauh taka kalpui a ni a, lirthei chevel hmuh tur a awm loh bakah, dawr leh sumdawnna hmun te khar a ni. District dangah pawh bandh hi kalpui a ni a, thlawp a hlawh ṭha thawkhat hle. 
Kiphire-ah chuan KDJCC hmalaknain USLP, Tikhir Tribal Coun­cil leh Kiphire District GB Association-te chuan bandh hi an kalpui a, Kiphire Town Council-a chuh tum candidate 18-te chuan February 1-a election neih turah an inhnuhdawh thu an puang ve leh. Chakhesang Youth Front (CYF)-te chuan Phek district-ah bandh hi an huaihawt a, mipuiin an thlawp ṭha thawkhat hle. State chhunga inkal­pawhna kawngpui pawi­mawh eng emaw zat chu dan a ni a, hei hian lirthei chevel a tibuai hle bawk.