Meghalaya-in zan lam curfew pawtsei

Meghalaya sorkar chuan hripui leng avanga zan dar 9 leh zing dar 5 inkara curfew a puan chu June 30 thleng atan a pawtsei. State dang nena inkalpawhna tun thla chhung atan khar chhunzawm a ni bawk. 

Khuahkhirhna siam hi nimin khan a tawp hun tur a ni a, mahse Pathianni khan sorkar chuan a pawt sei leh ta a ni. 

State sorkar chuan khuahkhirhna siamte a thlahdul ṭan zel a, nimin aṭang khan IewDuh market-a dawr 1,222 zinga 400 chuang chu hawn phalsak an ni. Beauty parlor, salon leh barber shop-te pawh hawn phalsak an ni tawh a, mahse social distancing dan chu khauh taka keng kawh tura tih an ni thung. India-Bangladesh ramri leh Assam nena an inrina bula mi tih loh, kartin bazar-te chu hawn a phalsak tawh bawk. 

Meghalaya-a Covid-19 kai hmuh chhuah mi 44 zinga 37 chu enkawl dam ni tawhin, enkawl mek mi paruk chauh an awm tawh. India ram state zingah hri kai hmuh tlemna ber a ni a, recovery rate pawh 84% a tling tawh a ni.