ULB Election: Dodalna karah inthlan kaltlangpui a ni dawn

Nagaland State Chief Minister TR Zeliang chuan Urban Local Body (ULB) inthlan neih tur chu dodal­na nasa tak awm mah se kal tlangpui a nih tur thu a sawi.

Kar kalta Zirtawpni khan state cabinet meeting chuan election kaltlangpui tur hian thutlukna a siam a ni. TR Zeliang chuan, state sorkarin ULB election-a hmeichhe tana seat 33% hauhsak tura thutlukna a lo siam tawh chu kaltlangpui a ni dawn tih sawiin, tribal-te'n nasa takin lungawi lohna lantir mah se election chu kaltlangpui a ni ang, a ti. Dan chu mipuite nawrna vang ngawta tihdanglam theih a ni lo tih sawiin, danin a phut ang zawka kal a ngai a ni, a ti. Election chu boruak muanawm tak hnuaiah neih a beisei tih sawiin, tribal pawl hrang hrangte chu harsatna siam zawnga che lo turin a ngen.

Mimal leh pawl anga sorkar hmalakna dodal chu dan kalh a nih thu sawiin, hei hi remchangah hmanga politics hamṭhatna lo zawn chu tih loh tawp tur a ni,a ti. Nagaland chu Kristian tamna state a nih thu sawiin, dan kalh leh tharum thawha chetna te chu thil inhmeh lo tak a ni, a ti. January 17 hnu lama candidate inhnukdawk leh te chungchangah sawi tur a nei lo tih sawiin, pawl leh mimal anga candidate-te inhnukdawk leh tura nawr chu thil ṭha lo tak a ni, a ti.

Zeliang chuan, kum 2016 December khan Legislative Assembly chuan Nagaland Municipal Third Amend­ment Act, 2016 chu a pass tih sawiin, Scheduled Caste-te tan seat hauhsakna dan chu paih a ni, a ti. State Election Commission-in ULB election neih hun tura a ruat chu state sor­kar chuan kaltlangpui a remti tih sawiin, tribal pawl hrang hrangte chu inbiakna neihpui an tum thu a sawi bawk.

Hetih lai hian tribal pawl hrang hrangte chuan district eng emaw zatah bandh an huaihawt a, hei hi nimin aṭang khan an chhunzawm leh a ni. Election neih hun tura ruat February 1-ah pawh bandh hi kaltlangpui turin ruahmanna an siam a ni. Kar kalta Inrinni khan state chhunga district pasarih-ah bandh hi kalpui a ni a, zawm a hlawh ṭha hle.