Meghalaya Chief Minis­ter Mukul Sangma chuan, naupang kumtling lo pawng­sual chungchanga inhnam­hnawiha puh Home Minister Horju Donkupar Roy Lyngdoh chu a nihna aṭanga a ban loh tur thu Inrinni khan a sawi. 
Meghalaya Home Minister Roy Lyngdoh hi naupang kumtling lo pawngsuala puh a ni a, he puhna avang hian eptu party-te chuan bang turin an phut a ni. Sangma chuan Roy Lyngdoh chungchang hi sawiin, he thil hi dan anga chhui mek a ni a, pawngsualtu a ni ngei em tih finfiahna a la awm loh avangin ban ngawt theih a ni lo, a ti. Amah Lyngdoh ngei pawhin a ban loh tur thu hi thuthar thehdarhtute hmaah a lo sawi tawh a, thil tih dik loh a neih loh thu sawiin, pawngsual thlenna hmun nia an sawi guesthouse pawh a tlawh loh thu a sawi. Thil thleng chu police-te'n chak taka an chhui mek thu a sawi bawk. 
Bharatiya Janata Party (BJP) leh eptu party dangte chuan Lyngdoh hi bang turin an nawr mek. Meghalaya-ah hian naupang kum 14 mi chu HM Lyngdoh-a fapa, Nathaniel Osbert Rymmai-a guesthouse-ah mi paliin an pawngsual rawn nia sawi a ni a, he thilah hian police-te chuan mi 16 an man tawh a ni. Man zingah hian Independent MLA Julius Kitbok Dorphang pawh a tel a, a ni hi state guesthouse hrang hrang leh, state sorkar enkawl resort-a mipat hmeichhiatna lama hawia chetna thlengah inhnamhnawihna neia puh a ni. 
State BJP Secretary Nalin Kohli chuan, naupang kum tling lo pawngsualnaa inhnamhnawih te chu man chhuah a, an phu ang tawk hremna pek an phut thu leh, inhnamhnawihna nei Minister leh MLA-te chu an nihna aṭanga bang tura an phut thu a sawi. He thila mawhphurtu bera ngaih Home Minster-in tun thlenga a office a la luah chu an hrethiam lo tih sawiin, ama guesthouse ngeia pawngsualna thlengah hian mawhphurna la ngama bang tura an phut thu a sawi. 
Opposition leader Don­kupar Royp pawhin, hnuchhui chak zawka kalpui a nih theih nan Chief Minister chu HM Lyngdoh-a hna chanpual chelh mekte hlih sak rih turin a phut. Hetih lai hian Thma U Rangli (TUR) leh Civil Society Women’s Organisation-te pawhin HM chu a nihna aṭanga ban tir an phut thu an sawi.