Assam-ah National Highway siambelh a ni ang : Gadkari

Union Road Transport and Highways Minister Nitin Jairam Gadkari chuan Assam-ah National Highway km 1,253-a thui siambelh a nih tur thu sawiin, hemi atan hian cheng vaibelchhe 15,000 ruahman a ni, a ti.

Gadkari chuan, "Assam Chief Minister Sarbananda Sonwoal nen meeting kan neih ṭumin Sonowal chuan NH km 1,253 siambelh a nih theih nana hmalakpui turin min ngen a, chu mi atana a hlawhtlinna hmasa chu vawiin hian puanchhuahin a awm ta a ni" tiin, Pathianni-a Barhamputra lei dawh a hawnnaah a sawi. Minister chuan Assam stae chhunga NH cheiṭhat leh tihchangtlunna turin sorkar laipui chuan cheng vaibelchhe 15,000 a pechhuak tawh tih a sawi bawk.

NH kawngpui thar siam thuai a nih theih nan state sorkar chu Detailed Project Report (DPR) siam turin thurawn a pe a, DPR peihfel a, pawm a nih hnuah project hi kalpui tum a ni, a ti. National Highways and Infrastructure Development Corporation Ltd (NHIDCL) chuan cheng vaibelchhe 8,000 senna tur project a duang mek tih sawiin, he project hian NH kawngpui siamna tur leh Brahmaputra lei dawhna tur te a huam a ni, a ti. CM Sonowal-a bial Majuli chu kawng hrang hranga tihmasawnna tum a ni, a ti bawk.