Kiren Rijiju-a'n Meghalaya Governor ban chhan chhui chian a phut

Union Minister of State for Home Kiren Rijiju chuan, Megahlaya Governor V. Shanmuganathan-a ban chhan dik tak chu chhuichian a phut tih a sawi.

Rijiju chuan Governor ban chhanah hian thuthang a tam em em a, sawi dan hrang pawh a awm nual a ni. Document nena finfiahna a awm loh avangin ngaihdan a tam hle a ni, a ti. Shanmuganathan hian January 26 khan President Pranab Mukherjee hnenah banna a thehlut a, a ban dilna hi kar kalta Zirtawpni khan pawmsak a ni a, amah thlaktu tur ruat a la ni lo. Amah thlaktu ruatfel a nih hma chuan Assam Governor Banwarilal Purohit chu Meghalaya Governor lailawk atan ruat a ni.

Governor V. Shanmuga­nathan hi Raj Bhavan-ah mawi lo takin a che fo ṭhin nia sawi a ni a, mipat hmei­chhiatna lamah pawh mawi lo takin a ch ṭhin nia sawi a ni. Raj Bhavan staff-te chuan Raj Bhavan zahawmna tibawrhbangah puhin, ban tura phutna lehkha pawh Prime Minister Office-ah an lo thehluh tawh a ni. Shan­muganathan hi May 20, 2015 khan Meghalaya Governor atan lakluh a ni a, kumin January 26 khan banna a thehlut leh ta a ni. Hemi chungchangah hian Meghalaya Chief Minister Mukul Sangma pawhin sorkar laipui thutluknaah an innghah thu a lo sawi tawh a ni.