Sikkim-in thla 4 chhung lei laih a khap

Sikkim sorkar chuan fur lai, June 1 aṭanga September 30 thleng construction hna thawhna atana lei laih a khap.

Nilaini khan Urban Development Department chuan thupek tichhuakin, fur lo thleng tur vangin thla li chhung lei laih hi khap a nih thu a tarlang. Hemi chhung hian construction order pawh engmah tihchhuah a ni dawn lo tih a sawi.

Hriattirna tihchhuah hnua lei laih hna thawkte chu hrem an nih tur thu sorkar thuchhuah chuan a tarlang a, an lei laih avanga chhiatna thleng leh, nunna chan palh an awm pawhin mawhphurtu liau liauah puh an ni ang, a ti.

Khapna siam chhung hian sorkar laipui leh state sorkar hnuaia project, thawh chhunzawm ngei ngaite erawh chu Urban Development Deparmtent-in a remtih hnuah thawh chhunzawm theih a ni ang.

Sikkim hi seismic zone IV-a awm niin, lirnghing a thlen fo bakah leimin leh leitawlh, a bikin fur laiin a thleng fo bawk a ni. Hei vang hian sorkar chuan fur laia chhiatna thleng thei laka invenna kawng khat atan lei laih khapna hi a siam a ni.