Meghalaya-in ruihhlo do beihpui thlak dawn

Meghalaya sorkar chuan hmarchhak state dangte ruihhlo do beihpui thlak hna an kalpui mek ang chu an state-ah kalpui ve a tum.

Chief minister Conrad K Sangma chuan state home department leh police hnenah an state-a ruihhlo hluar chho zel do letna tur ruahmanna siam turin a ti a, ni sawm chhungin hma lak dan tur hi siam peih turin a ti a ni. Hei bakah ruihhlo dona kawnga hma an lak tawh dan report thehlut turin a ti bawk.

CM chuan, " Ka kalna hmun apiangah upa zawkte leh tualchhung miten ruihhlo hmansual a nasat chungchang min lo hrilh reng a ni," tiin ruihhlo dona kawnga beihpui thlak dan chungchang social welfare department lam pawh a sawipui tawh tih a sawi bawk.