HPC thilphut chungchang chu sorkar kutah a awm : Meghalaya Dy CM

Meghalaya deputy chief minister Prestone Tysong chuan Shillong-a Harijan Panchayat Committee (HPC)-ten Punjabi Lane aṭanga sawnchhuah turte tana thil an phut chungchangah sorkar chu thutawp siamtu tur a ni, a ti.

HPC hian Punjabi Lane aṭanga sawnchhuah tur, chhungkaw 342-te hnenah in hmun, square meter 200 ṭheuh pe tur leh, an in sakna senso pawh tumsak turin sorkar chu a phut a ni. He an thil phut hi Meghalaya-a pressure group hrang hrang chuan na takin an sawisel nghal a, ram leilung fa ngei zingah pawh ram nei lo tam tak an awm a, an ram luahtu zawkte hnenah in hmun lo pek hi an remti lo a, sorkar pawh HPC thil phut hi pawm lo turin an nawr a ni. Sorkarin HPC thil phut hi a remtih chuan nasa zawkin lungawi lohna hi an lantirah an vau a ni.

Hemi chungchang hi chhangin, deputy Chief Minister Tynsong chuan, tu pawhin thil phut leh ngenna chu an siam thei a, thutlukna erawh sorkar kutah a awm a ni, a ti. Urban affairs department hnenah pawh Harijan colony aṭanga sawnchhuah dan tur chungchang chu tifel thuai tura a hrilh thu leh, blueprint hi peihfel a nih hnuah HPC-te nen meeting neiin an sawiho dawn tih a tarlang.