Tripura CM thar atan Manik Saha lalut

Tripura Chief Minister aṭanga Biplab Kumar Deb a ban hnuah a thlaktu atan state BJP president, Manik Saha chu thlan a ni a, nimin khan Chief Minister thar atan rinawmna thu tiamtira lakluh nghal a ni.

Kum 69 mi, Manik Saha hi Rajya Sabha MP ni lai a ni bawk a, nimin khan Agartala-a Raj Bhawan-ah Governor Satyadeo Narain Arya chuan Chief Minister atan a lalut.

Saha hian kum 2016 khan Congress party chhuahsanin BJP a zawm a, kum 2018-a state inthlan neih dawna BJP-in membership drive an neihah khan in-charge atan dah a ni. Kum 2019 parliament inthlanpui neih dawn khan booth management committee in-charge-ah dah a ni bawk. Kum 2020-ah state BJP president-ah thlan niin, kumin March thla khan Rajya Sabha member atan thlan a ni zui leh bawk.

Kum 2018-a state assembly inthlan neiha BJP chakna chhan leh, Tripura-a a vawi khatna atana BJP sorkar a din theihna atana pawimawh nia sawi, Biplab Kumar Deb chuan central lama an party hotute nena meeting an neih hnuah, Inrinni liam ta khan CM a nihna aṭanga banna a thehlut a ni. Deb hian banna a thehluh hma hian Delhi-ah BJP national president JP Nadda leh union home minister Amit Shah-te pawh a hmu a ni.

Deb-a'n banna a thehlut leh, a thlaktu atana Saha ruat a nih nghal chungchangah rorellai BJP MLA ṭhenkhat an lungawi lo nia sawi a ni a, Inrinni pawh khan MLA lungawi lote hi a hranin an inhmukhawm a ni.

Nakkum maia state assembly inthlan an hmachhawn dawn avangin CM aṭanga Deb a bang hian an party mi leh sate pawh a ṭhawng hle. Mahse Deb chuan an party chuan inthlan neih tur atan party thuam chak hna thawk tura inpumpek tura an duh vang niin a sawi. "Party hi thil dang zawng aiin ka dah pawimawh a ni. BJP tana rinawm taka thawktu ka ni a, ka laka mawhphurhna min pek ang chu - BJP state president leh Tripura Chief Minister pawh ni se, theihtawpin ka thawk a ni. Tripura pum hmasawnna turin ka thawk a ni," a ti.

State BJP chu a bulṭhut atanga thuam chak turin sector hrang hrangah hma lak a ngai a, assembly inthlan lo awm leh tura an chak leh ngei theihna turin Chief Minister dinhmun aṭang ni loin, party worker anga a thawh a ngai niin a sawi.