Assam : Ṭhalai 22,958 -te hnenah appointment letter sem

Assam-a sorkar department hrang hranga thawk turin kar liamta Inrinni khan ṭhalai 22,958-te chuan state sorkar aṭangin appointment letter an dawng.

Chief minister Himanta Biswa Sarma chuan inthlan dawna an lo intiam tawh angin, a kaihhruai sorkar chuan mi nuai khatte sorkar hna pek ngei a tum tih sawiin, hemi tihlawhtling tur hian hma an sawn zel tih a sawi.

Sorkar hnaa lak tharte hnena appointment letter semna inkhawm hi Guwahati-ah buatsaihin CM Sarma hian thu a sawi a ni. Department 11 hnuaiah thawktu tharte hi lak an ni a, education department-ah tam berin mi 11,063 lak thar an ni a, home department-ah thawktu 8,867 leh health department-ah 2,419 lak thar an ni bawk.

CM Sarma chuan Covid-19 hri leng a ziaawm chhoh hnuah sorkar hna thawk tur hi an lak chhoh thu sawiin, July 15-ah mi 7,000 - 8,000 vel lak belh an ni leh dawn a, July thla tawpah post 26,000 atan written examination an buatsaih leh dawn bawk tih a sawi. Sorkar hna lak danah pawh felfai taka kalpui a ni a, thamna inpek leh thamna la tumah an awm lo niina sawi.

Sorkar hna thawk tura lak tharte chu an hlawh bak dik lo taka sum dang lakluh tum lo turin Chief Minister chuan a chah a, sorkar chuan hlemhletna leh eirukna a do zel dawn a, dik lo taka thiltite chu enliam mai mai an ni dawn lo a ni, a ti. Assam chu India rama hnathawk ṭha ber state-ah siam an tum a, hemi atan hian mipuite rawng an bawlnaah tih tak zeta inpe turin a chah.