Manipur : Sorkar laipui hmalaknain inbiakna nei dawn

Union Ministry of Home Affairs chuan Manipur-a National Highway (NH) danchah chungchangah, United Naga Council (UNC) leh Manipur sorkar-te chu remna zawngin inbiakna a neihpui dawn.

Manipur-ah hian nikum November 1 aṭang khan UNC-te chuan tiamchin awm loin NH-37 leh 2 an dangchat a, hei hian nghawng a nei lian hle. NH-2 chu hawn a ni leh tawh a, NH-37 erawh danchah a la ni. Manipur chakkhai lamna kawngpui pawimawh danchah a nih vang hian tualchhung buaina a chhuak a, hmun hrang hrangah inlambunna leh tharum thawhna a thleng fo a ni. Hemi titawp tur hian sorkar laipui chuan nasa takin hma a la a, nikum November 15 khan remna zawnga inbiakna pawh a lo buatsaih tawh a ni.

MHA official chuan, Manipur sorkar leh UNC palaite nena inbiakna nei tur hian hmalakna kalpui mek a nih thu sawiin, February 5-ah New Delhi-ah remna zawnga inbiakna hi neih tura ruahman a ni, a ti. Inbiakna neih hmasak a nih ṭum khan Manipur sorkar chuan official-a sawmna a dawng lo niin a sawi a, palai a tir lo. Union Home Minister Rajnath Singh-a ngenna angin tun hnai khan Manipur sorkar chuan UNC-te chu Imphal-a inbiakna neihpuiah a sawm a, mahse UNC lam chuan Imphal-a inbiakna neih chu a remtih loh thu sawiin, Naga-te chenna hmunah emaw, New Delhi-a inbiakna neih an phut a ni.

Inbiakna neih tura Manipur sorkar sawmna UNC-te'n an hnawl hnuah sorkar laipui chuan ruahmanna dang a siam ve leh ta a ni. Hemi chungchangah hian Manipur sorkar leh UNC-te chuan thuchhuah an la siam lo thung. UNC-te chuan remna zawnga inbiakna neih a nih pawhin Manipur sorkar kaihhruaina hnuaia neih an rem tih loh thu leh, sorkar laipui kaihhruaina hnuaiah neih an duh thu an lo sawi tawh bawk.

Kum 2017 kum tawp lam khan Manipur sorkar chuan district thar pasarih a din a, hei hi Naga hel pawl, National Socialist Council of Nagaland (Isak-Muivah) leh UNC-te chuan nasa takin an dodal zui a ni. District thar pasarih puan a nih hma hian state cabinet chuan Sadar Hills leh Jiribam-te chu district-ah hlankai a remti a, hei hi Manipur-a Naga-te chuan duh loin, buaina hi a inṭan ta a ni.