Assam assembly speaker thar - Goswami

Bharatiya Janata Party (BJP) MLA Hitendra Nath Goswami chu Thawhṭanni khan Assam assembly speaker atan thlan a ni.

Assembly Deputy Speaker Dilip Kumar Paul chuan, Goswami chu member-te'n lungrual takin speaker atan an thlang tih a sawi. Thla hmasa khan speaker nilai Ranjeet Kumar Dass chuan BJP Assam unit president atan thlan a nih avangin speaker a nihna atanga a ban thu a lo puang tawh a, a aiawh turin Goswami hi lakluh a ni ta a ni. Goswami chuan, "Speaker ka nih angin democracy vawng nung zel tur leh party thlei bik nei loin hna ka thawk dawn a ni. House zahawmna ka ngaipawimawh ber a, chhan hrang hrang vanga inkhawm tihtawp ka remti ngai lo ang" a ti. Speaker thar hi Asom Gana Parishad (AGP) minister hlui a hlui a ni a, Jorhat constituency aṭanga thlan tlin a ni.

Hetih lai hian eptu party lian pahnih, Congress leh All India Unitedf Democratic Fron (AIUDF)-te chuan assembly budget session neih ṭannia Governor Banwarilal Purohit-a'n thu a sawi laiin bengchheng an lo siam a, Governor chu a thusawi titawp turin an nawr. Purohit chuan,“Ka sorkar (Assam sorkar) chuan hmasawnna kawnga danglamna thlen turin theihtawp a chhuah a, Mahapurush Srimanta Sankardev, Mahapurush Madhavdev leh Ajan Pir scheme-te a duangchhuak a ni" a ti. A ṭawngkam hman hi eptute chuan helhin, Governor chu a thusawi titawp turin an phut a ni.

Mahse Governor chuan a thusawi chu chhunzawmin, "Ka sorkar chuan Barak valley, Brahmaputra valley, hill area leh plain-a chengte tan rualkhai takin hmasawnna a kalpui a ni" a ti. Hemi hnu hian Congress leh AIUDF-te chuan nasa takin bengchheng an siam zui a, BJP kaihhruai sorkar chu a ṭhat tawk loh thu te, inrelbawlna kawnga a hlawhcham thu te an auchhuahpui. Governor hian minute sarih thu a sawi hnuah, a thusawi chu a titawp ta a ni.