Irani-i'n Meghalaya-ah apparel and Garment Making Centre hawng

Union Textile Minister Smriti Zubin Irani chuan Thawhṭanni khan Meghalay-ah puantahna, apparel and garment making centre a hawng.

Union Minister Irani chuan, Meghalaya tana apparel and garment making centre hmasa ber hawn a ni ta chu lawmawm a tih thu sawiin, ṭangkai taka hmasawn nan hmang turin duhsakna a hlan. Centre din nan hian cheng vaibelchhe 14.26 sen a ni a, hmarchhak state eng emaw zatah hawn a lo ni tawh bawk. Centre hi South West Garo Hills-a Ampati-ah din a ni a, a hawnna hun hi Meghalaya Chief Minister Mukul Sangma, Union Minister of State (Home) Kiren Rijiju, Sericulture Minister Clement Marak, Sport Minister Zenith Sangma leh sorkar mipawimawh eng emaw zatin an hmanpui.

Irani chuan Prime Minister Narendra Modi-a'n hmarchhak hmasawnna a ngaihpawimawh thu sawiin, chu mi tihlawhtling tur chuan kawng hrang hrangin hmalakna kalpui mek a ni, a ti. Textile project atan cheng vaibelchhe 70 ruahman a nih thu sawiin, vaibelchhe 32 chu pekchhuah tawh a niin a sawi. May 22, 2015 khan Centre dinna tur hian Chief Minister Mukul Sangma chuan lungphum a lo phum tawh a ni.