ULB Election : Election neih hun sawn Guwahati HC-in dan siamtha turin hriattir

Nagaland-a Uraban Local Council Body (UBL) election neih hun tura ruat February 1 chu, state sorkar leh Joint Coordination Committee (JCC)-te'n inbiakna an neih hnuah sawn hlat a ni.

Nagaland sorkar chuan Thawhṭanni khan February 1-a ULB election neih tura lo ruahman tawh chu a hun sawn a remtih thu a puang a ni. Kar kalta Zirtawpni khan state cabinet meeting chuan election kaltlangpui hi a lo remti tawh a, mahsela Joint Coordination Committee (JCC)-te'n duhlohna lantira bandh an huaihawt avangin sawn a ni ta a ni. Hemi chungchangah hian Nagaland Chief Minister TR Zeliang-a kaihhruaina hnuaiah JCC leh sorkar aiawhte chuan Nagaland Baptist Church Council (NBCC)-ah meeting an nei a, election neih hun sawn hlat hi an remti ta a ni. Election neih hun tur erawh tihfel a la ni lo.

JCC thuchhuah chuan, February 1-a ULB election neih tura tih chu a hun sawn hlat a nih tak thu sawiin, tribal pawl hrang hrangte nena inbiakna neih leh tur a la nih avangin, inthlan neih hun tura ruat aṭanga thla hnih ral hma chuan election buatsaih a nih loh tur thu an tarlang. Hetih lai hian bandh an huihawt pawh an tihtawp nghal thu an sawi a, Nagaland state election commission thutlukna an ngaihchan mek thu leh, state cabinet leh state election commission-te'n inthlan neih hun tura an ruatah mipuite chu vote thlak ngei tura an duh thu an sawi.

JCC hian state sorkarin hmeichhe tana seat 33% a hauhsak duhlohna lantir hian, kar kalta aṭang khan district pasarihah bandh an huaihawt a, nunphung a khaihlak nasa hle. Dimapur-ah chuan bandh huaihawttute leh police-te innawr buainaah mi pahnihin nunna an chan a, midang pangain hliam an tuar a, Longleng-ah pawh mi pasarihin hliam an tuar tih police-te chuan an sawi. Hmun hrang hrangah buaina chhuak leh boruak sosang lutuk tur veng turin police ṭhahnem tak duty tir an ni a, venhimna khauh taka kalpui a ni.

Chief minister chenna panna kawngpui National Highway-29-ah chuan lungawi lo mi tam tak an pungkhawm a, mipui pungkhawm hnawhdarh nan hiann police-te chuan water cannon leh hmanraw dang an hman a ngai hial a ni. Eastern Nagaland Peoples’ Organisation (ENPO)-te chuan hliam tuar zingah an mi leh sa eng emaw zat an tel tih sawiin, pawi an tih thu an sawi.

Hetih lai hian Guwahati High Court chuan Thawhlehni khan state sorkar hnenah hriattirna pein, Municipalities and Town councils-a hmeichhe tana seat 33% hauhsak chu siamṭha turin a hriattir. HC-ah hian Naga civil society-te chu an zualko a, ULB election neih tura hmeichhe tana seat 33% hauhsak chu Naga-te culture zah lohna leh dan kalh a nih thu an thlen a ni. Hemi chungchangah hian Court chuan state sorkar hnenah hriattirna a pe a, inthlanna fel fai leh boruak muanawm tak hnuaiah mipuiten vote an thlak theih nana inthlan buatsaih turin a hriattir bawk.