Assam-ah tuilian vangin mi 3 an thi

Assam-ah kar liam taa ruahsur nasa avangin tui a lian a, hmun tam takah leiminin kawng a hnawh bawk. Tuilian vanga harsatna tawk hi mi 56,000 an tling. Ruahsur avanga chhiatna thlengah Dima Hasao district-ah mi pathum an thi a, chin hriat lohin mi eng emaw zat an awm bawk.

Sorkarin data a tihchhuah thar berah, thingtlang khaw 222 vel chu tuilian hian a chim a, hectare 10,000 vela zaua thlai chin pawh tuilian hian a tichhe vek bawk. Chenna in 200 chuang chu tuilian hian a tichhe tawh bawk a ni. Hmun hrang hrangah lei a min a, Jatinga-Harangajao leh Mahur-Phaiding inkara rel kawng chu leiminin a hnawh bawk a ni.

Sorkar chuan tuilian tuarte tan relief camp eng emaw zat a siam a, tuilian tuarte chhanchhuah hna hi Indian Army, paramilitary force, fire and emergency service leh SDRF mi leh saten an thawk a ni.

Indian Air Force (IAF) chuan tuilian leh ruahsur avanga tangkhang, Silchar-Guwahati rela chuang mi 119-te chu helicopter hmangin an thiarchhuak bawk.

Jorhat leh Majuli inkara ferry service pawh Brahmaputra lui tui sang zel avangin Pathianni aṭang khan tiam chin awm loin tihtawp rih a ni. Kar liam taa ruahsur nasa avangin Brahmaputra lui tui hi a sang chho mek a ni.

Tuilian hi district pasarih velin an tuar a, an zingah Cachar, Dhemaji, Hojai, Karbil Anglong leh Nagaon district-ten an tuar nasa zual a ni. Cachar hi a tuar nasa ber niin, harsatna tawk hi mi 21,500 vel an awm tawh.