Tripura MLA 11-te minister atan lalut

Tripura chief minister thar atana Manik Saha lakluh a nih hnuah, nimin khan a minister turin MLA 11-te chu rinawmna thu tiamtira lakluh an ni ve leh.

Minister atana lakluhte hi BJP MLA pakua leh Indigenous People's Front of Tripura (IPFT) MLA pahnih an ni. Chief minister hlui Biplab Kumar Deb-a hnuaia minister zingah IPFT MLA Mevar Kumar Jamatia tih loh chu minister-ah hian dah leh vek an ni. Council of Minister-ah hian hmeichhe pakhat a tel a ni. Minister zingah hian hmel thar pahnih chauh an awm a, a bak mi pakuate chu Deb hnuaia minister lo ni tawh vek an ni.

IPFT party chhungah innghirnghona awm avangin CM hlui Deb hnuaia Forest and Tribal Welfare Minister Mevar Kumar Jamatia chu an party hotu, Narendra Chandra Debbarma thu angin sorkar tharah hian minister aṭangin paih a ni.

Governor SN Arya chuan Raj Bhavan-ah cabinet minister-te hi rinawmna thu tiamtirin a la lut a, he hun hi chief minister Manik Saha, CM hlui Biplab Kumar Deb leh official dangten an telpui.