Manipur Poll : BJP-in candidate-te hming puang leh Sharmila-i'n CM a khing dawn

Manipur Assembly election neih turah Bharatiya Janata Party (BJP) chuan Nilaini khan canddiate hming a puang leh a, a hmain ṭum hnih a lo puang tawh bawk.

Nilaini hian Lamsang biala ding tur S Rajen leh Bishnupur biala chuh tur K Krishnakumar-te hming puan a ni a, midang 58-te hming chu puan a lo ni tawh. BJP hian January 23 khan candidate 31-te hming a lo puang tawh a, February 4 khan hming 27 puang lehin, Nilaini khan a bak candidate pahnihte hming a puang chhuak leh a ni. Seat 60 chuh tur hian Congress party pawhin candddiate 60 a thehchhuak dawn a, an hming puan chhuah a ni tawh bawk. Party hrang hrang inzawmkhawm Left and Democratic Front Manipur (LDFM) pawhin candidate 30-te hming a tlangzarh tawh a, LDFM-ah hian Communist Party of India (CPI), Communist Party of India (Marxist), Aam Aadmi Party (AAP), Janata Dal (United) JD(U), Nationalist Congress Party (NCP) leh Manipur National Democratic Front (MNDF)-te an awm a ni.

Hetih lai hian Rights activist, Irom Sharmila chuan Manipur Chief Minister ni lai Okram Ibobi Singh chu Thoubal constituency-ah a khin tur thu tunhnai khan a sawi ve leh. Sharmila hian dan sakei an tih mai, Armed Forces (Special Powers) Act hlih a nih theih nana kum 16 chhung zet chaw ngheiin sorkar a kar a, kum 2016 August thla khan a tawpsan a ni. Chaw nghei a tawpsan thu a puan hnu lawkah politics a luhchilh tur thu a sawi a, assembly election an hmachhawn turah, CM Ibobi Singh chu Thoubal bialah a khin tur thu a lo sawi lawk tawh a ni.

Sharmila-i hian political party thar, People’s Resurgence and Justice Alliance (PRJA) a din a, PRAJA ticket hian Thoubal bialah hian a chuh dawn a ni. Manipur chief minister nih chu a thil tum a nih thu sawiin, AFSPA chu politics hmanga do let zel a tum thu a lo sawi tawh bawk. Sharmila-i hian Thoubal bakah hian Khurai bialah a chuh tel dawn a ni. PRJA hian tun hnai khan an party symbol ‘whistle’ chu an tlangzarh a, candidate 10 an thehchhuak dawn a ni. Hetih lai hian Nagaland state-a rorel lai Naga People’s Front (NPF) chuan Manipur Assembly election-ah hian candidate 15 an thehchhuak dawn bawk.

Manipur Pradesh Congress Commi­ttee (MPCC) chuan BJP national general secretary Ram Madhav lakah complaint an thehlut. Complaint hi chief electoral officer hnenah an thehlut a, a thusawiah mimal hming a sawichhia a ni, an ti. MPCC thupuangtu Khumukcham Joykishan Singh chuan, BJP national leader hian a thusawiah mimal hming lam riin, nasa takin a bei a ni a ti a, hei hian model code of conduct a bawhchhiat avangin hrem ngei an phut tih a sawi.

Manipur assembly election hi March 4 leh 8-ah neih a ni dawn a, party hrang hrangte chu ngawrh takin an campaing mek a ni. Rorel lai Congress party chuan February 3 khan candidate 60-te hming a puang a, chief minister Ibobi Singh chu bial hnihah a ding dawn a ni. North East Democratic Alliance (NEDA) pawhin candidate an thehchhuak ve dawn nia sawi a awm bawk. NEDA hi BJP kaihhruaina hnuaia din a ni a, hmarchhaka party hrang hrang awmna niin, Congress party erawh a tel lo thung.

Manipur-ah hian United Naga Council (UNC)-te'n tiam chin awm loa National Highway an danchah avangin election neih turah pawh nghawng nasa tak a nei a ni. State sorkarin UNC-te chu nawrh titawp turin ngen fo mah se, tun thlengin a la hlawhtling lo a ni. Sorkar laipui hmalaknain inbiakna neih ni mah se UNC-te chuan an thil phut tih hlawhtlin a nih hma loh chuan NH an dan zel tur thu an sawi.

Chief Election Commissioner Nasim Zaidi kaihhruaina hnuaiah, Election Commission of India (ECI) palaite chuan Manipur an tlawh dawn a, election neih tura harsatna hrang hrang thleng theite a hmunah kalin an enfiah dawn a ni.