Assam-ah kum 2016 chhungin samak 123 an thi

Assam-ah chuan kum 2016 chhungin samak 123 zet an thi tih Legislative Assembly House-ah sawichhuah a ni.

State Forest minister Pramila Rani Brahma chuan kum khat chhunga samak thi zat chu 123 a nih thu sawiin, kum 2017-ah 23 an thi tawh tih House a hrilh. Kum 2016 chhunga samak thi zinga 22-te chu sapeltute thah an ni a, kumin bikah sapeltute chuan pakhat an kap leh tawh bawk. A bak zawk chu natna avang te, tuilian leh chhan hrang hrang vanga thi an ni. Kaziranga National Park chu samak thi tamna ber a ni a, Manas National Park leh Orang National Park bakah, reserve forest area pawn lama thi an awm bawk.

Sapeltute leh helama inhnamhnawih mat tawh zat chu mi 92 an ni a, an zinga mi 71-te hi Kaziranga National Park-a sapeln leh a kaihhnawih thila man te an ni. Orang National Park-ah pawh mi 12 man an ni bawk. Hetihlai hian tunhnai kum nga chhungin Assam-ah hian sai 426 thah an ni tawh. Kum 2015 bikah 118 thah an ni a, 2016 chhungin sai 92 zet tihhlum an ni bawk. Heng zinga 99 chu sai sual, mihring leh chenna-in tihchhiat vanga tihhlum te an ni a, electric man avanga thi 48 leh, rel-in a sut hlum 27 zet an awm a ni. Tun hnai kum nga chhungin mihring himna tiderthawng theia ngaih avanga keite tihhlum 36 zet an awm bawk.

Forest minister Brahma chuan, Assam-ah kum 2015 chhiarpui khan samak 2431 an awm tih sawiin, Kaziranga National Park chu samak cheng tamna ber a ni,a ti. Kum 2011-ah sai 5620 an awm a, hemi kum vek hian sazuk 1169 an awm a ni. Kum 2014 khan sakei 167 an awm a, 2000 khan keite 248 an awm bawk a ni. Assam hi hmarchhaka National Park nei

ṭha ber te zinga mi a ni a, khawvel hmun danga hmuh tur awm zen zel lo samak tamna a nih avangin a hmingthan phah hle.