Manipur : JCILPS-te'n khua leh tui ni lo candidate awm remti lo

Manipur-a tribal pawl hrang inzawmkhawm Joint Committee on Inner Line Permit System (JCILPS) chuan assembly election neih turah khua leh tui dik tak ni lo candidate awm an rem ti lo tih an sawi.

Congress chuan Kang­pok­pi constituency-a chuh turin Nepali candi­date an thehchhuak a, hemi hnu hian thuchhuah an siam ta a ni. JCILPS thuchhuah chuan, poli­tical party hrang hrangte chu khua leh tui dik tak ni lo candidate-ah hmang lo turin an ngen tih an tarlang a, kum 1951 hnu lama Manipur-a cheng ram dang mite chu khua leh tuiah pawm theih an ni lo, an ti. JCILPS hruaitu BK Moirangcha chuan party hrang hrangte hnenah ngenna an thehluh tawh thu sawiin, zawm sak ngei turin an duh tih a sawi.

JCILPS-te hi Manuipur assembly-in tribal bill pathum - Protection of Manipur People Bill, 2015, Manipur Land Revenue and land Reforms (Seventh Amendment) Bill, 2015 leh Manipur Shops and Establishments (Second Amendment) Bill, 2015 a pass duh loa nawrh huaihawttute kha an ni. BK Moirangcha chuan state sorkar chu tribal-te hlamchhiah lo tur leh, state mipuite himna ngaihtuaha chak zawka hma la tura an phut thu a sawi. Congress party-in candidate atana Nepali, Khadga Tarnang an thehchhuah chu an dem tak zet tih sawiin, candidate a nihna sut sak leh turin an ngen.

Manipur assembly election hi March 4 leh 7-ah neih a nih tur thu Eletion Commision of India chuan a puang tawh a, hetih lai hian mi tam tak chuan United Naga Council (UNC) ten tiamchin awm lo a National Highway an danchah mek avangin inthlan fel fai tak neih a harsat an rin thu an sawi. Rorel lai Congress party chuan candidate turte hming a puang tawh a, anmahni khing tawk ber tura ngaih BJP pawhin candidate mi 60 te hming a puang chhuak tawh bawk.