Panchayat member 549-te'n BJP an zawm

Arunachal Pradesh Chief Minister Pema Khandu chuan Ningani khan an state chhunga panchayat member 549-te chu Bharatiya Janata Party (BJP)-ah a lawmlut.

Member lawmluh inkhawm hi East Kameng district-a Seppa-ah neih a ni. Khandu chuan member tharte chu thinlung taka a lo lawm thu sawiin, party tana an theihna leh finna te hmang turin a chah. Panchayat member eng emaw zat an party-ah lawmluh tur an la nei tih sawiin, February 20 hmain heng mite hi lawmluh leh an ni ang, a ti.

BJP zawm tharte hi a tam zawk chu Congress party an ni a, party dang eng emaw zat an awm ve bawk. Khandu hi Congress MLA ṭhin a ni a, kum 2016 khan central-a Congress party nen an inzawm­na chhuchatin amah leh MLA eng emaw zatin party chhuahsanin, Peoples' Party of Aruanchal (PPA) an zawm a, sorkarna an siam zui a ni. Hemi hnu, nikum December 31 khan PPA chhuahsanin BJP a zawm leh a, sorkarn an siam leh mek a ni.

Chief Minister Khandu chuan, Prime Minister Narendra Modi leh Union Minister Kiren Rijiju-te'n Arunachal an ngaihsak chu lawmawm a tih thu sawiin, a kaihhruai sorkar chuan hmabak eng tak a nei niin a sawi. Arunachal aṭanga Union Minister nihna chelh mektu Rijiju chuan chuan member thar lawmluhna inkhawm hi a hmanpui ani. Panchayat member-te chu state sorkar tichaktu ni turin a fuih a, sorkar laipuiin Arunachal a dah pawimawh thu a sawi ve bawk. Rijiju chuan CM Khandu-a chu state mipuite tana a hnathawh te avangin a fak a, amah thlawp zel turin kal khawmte a fuih.