Assam CM ‘Z+’ VVIP security pe

Assam Chief Minister Sarbananda Sonowal chu India rama venhimna ṭha ber ‘Z+’ VVIP security pek a ni.

Union Home Ministry chuan Assam CM hnenah hian armed commando hran a pek thu central security agency chuan a tarlang a ni. Sonowal hi a bika training pek police eng emaw zatin an veng dawn a ni.

Union Home Ministry chuan National Security Guard (NSG)-a black cat comman­do-te chu Sonowal-a veng tur hian a bikin a ruahman sak a, hel pawl leh misual lakah a him zawkna tura ruahmann a ni. Kum 2013 khan Chhattisgarh Chief Minister Raman Singh chu ‘Z+’ VVIP security pek a lo ni tawh bawk.

Official chuan Assam CM chu comman­do 35 velin an vil reng tur thu a tarlang a, Assam khawpui Guwahati-a a chenna pawh uluk taka ven a ni ang, a ti. Assam-ah hian hmarchhaka hel pawl lian United Liberation Front of Asom (ULFA) leh National Democratic Front of Bodoland (NDFB)-te chuan pawikhawihna an thlen fo avangin CM hi venhimna khauh leh ṭha zawk pek a ni. Congress sorkara chief miniter Tarun Gogoi chu ‘Z+’ VVIP security pek a lo ni tawh a, a ni bakah hian chief minister hlui Prafulla K Mahanta pawh pek a lo ni tawh bawk.

Anni bakah hian Union Home Minister Rajnath Singh, Samajwadi Party hotu Mulayam Singh Yadav, Uttar Pradesh Chief Minister Akhilesh Yadav, Uttar Pradesh chief minister hlui Mayawati bakah, BJP leader L K Advani-te chu ‘Z+’ VVIP security pek an lo ni tawh a ni.