Assam tuilianin zual lam la pan

Assam state-a ruahsur nasa avanga tuilian chuan zual lam a la pan zel a, tuilian vang hian district 20 huam chhunga mi nuai hnih velin harsatna an tawk mek a ni.

Hill district, Dima Hasao chu leiminin rel kawng leh motor kawngpuite a hnawh avangin tlawhpawh theih loin a awm mek.

Hojai leh Cachar district-te chu tuilian tuar nasa ber niin, Hojai-ah mi 78,157 leh Cachar-ah mi 51,357 ten harsatna an tawk tih Assam State Disaster Managment Authority (ASDMA) bulletin chuan a tarlang. Tuilian hi district 20-a revenue circle 46-a thingtlang khaw 625 ten an tuar mek a ni. Thawhṭanni khan Cachar district-ah mi pahnih an thih belh leh a, Dima Hasoa district-ah leimin vangin mi pali leh Lakhimpur-ah mi pakhat an thi bawk. Kar liam ta Zirtawpni aṭanga Assam-a ruahsur nasa avanga chhiatna thlengah nimin thleng khan mi pasarih an thi tawh a ni.

Sorkar chuan tuilian tuarte tan district pasarih-ah relief camp 55 a siam tawh a, heng hmunah hian mi 32,959 an awm mek. Tuilian tuarte tana chhawmdawlna semna tur, relief distribution centre pawh 12 a siam tawh bawk.

Tuilian tuarte chhanchhuah leh chhawmdawl hna hi tualchhung mite bakah National Disaster Response Force (NDRF), State Disaster Response Force (SDRF), Fire and Emergency Services ten an thawk a ni.

Thawhṭanni khan district hrang hranga-a hmun 16-ah tui daidanna siamte a chhia a, hmun tam takah tuilian leh leimin hian kawng, lei leh inte a tichhe bawk.

Indian Railways chuan Assam-a tuilian vang hian rel eng emaw zat a cancel. Northeastern Frontier Railway (NFR) CPRO Sabyasachi De chuan, May 24 thleng atan rel 28 cancel a ni tih a sawi.

NRF thuchhuah chuan lemin leh tuiin a chim avanga Dima Haso-a Lumding- Badarpur section-a khualzin phur rel pahnih, ni hnih chhung tang tawha chuangte chu him taka hruaichhuah kim an nih thu nimin khan a sawi. Rel kawng chhiate siamṭhat hna hi theihtawpa thawh zui nghal a nih thu leh; South Assam, Manipur, Tripura leh Mizoram-ah rel service tir leh thuai theih an tum tih an sawi. New Haflong Railway Station chu tuilianin a chim a, leimin nasa takin station-a khualzin phur rel ding pawh kawng aṭangin a hnawl a ni.

AP-ah mi 5 an thi
Arunachal Pradesh state-ah pawh Pathianni aṭang khan ruahsur nasa avanga chhiatna thlengah mi panga an thi tawh a, mi dang parukin hliam an tuar.

State sorkar thuchhuah chuan Thawhṭanni khan Itanagar leh Naharlagun inkar, Modirijo khuaah leiminin chenna in eng emaw zat a hnawl tih a tarlang.

Chief minister Pema Khandu chuan chhiatna thlenga thi chhungte a tuarpui thu sawiin, sorkarin zangnadawmna a theih anga pek a tum tih a sawi. Thuneitute chuan tuilian tuarte tan relief camp lailawk a siam thu leh, an awmna hmun him tawk loa ngaihte chu sawnchhuah rih an nih tur thu a sawi bawk.

May 1-16 chhung khan hmarchhak bialah ruah nasa takin a sur a, hei vang hian state ṭhenkhatten tuilian leh leimin vangin harsatna an tawk mek a ni. India Meteorological Department (IMD) chuan Arunachal Pradesh, Assam, Meghalaya leh Sikkim-ahte ni 405 chhung chu ruah la sur chhunzawm dawn niin Thawhṭanni khan a tarlang.