Army-in Nagaland-a civil mi thahna thleng chhui zo tawh : Eastern Command chief

Indian Army Eastern Command chief RP Kalita chuan nikum December thla Nagaland-a Mon district-a sipaiten civil mi an kahhlum chungchang Indian Army-in a hrana a chhuina chu an zo fel tawh tih Thawhṭanni khan a sawi.

Civil mite kahhlum an nih chungchang chhui tur hian Nagaland sorkar chuan Special Investigation Team (SIT) a din a, Indian Army hian Court of Inquiry (CoI) hi a hranin a nei bawk.

Eastern Command hotu LT Gen Kalita chuan, "Thil hriatsual vang leh, thutlukna siam sual vang a ni. Army CoI chuan chhui zo tawhin, an report hi enfiah mek a ni. SIT report pawh kan dawng bawk a, hei pawh hi enfiah mek a ni bawk," a ti. Thil thleng chungchangah hian mawhphurtu an awm chuan eng ang rank pawh ni se action lak a nih ngei tur thu a sawi bawk.

AP border-ah China-in infrastructure a din mek

LT Gen Kalita chuan China sipaiten Arunachal Pradesh-a international border-ah infrastructure a din niin a sawi bawk.

"China lam hian international border-ah hian an kawngpuite thuam ṭhain, rel leh air connectivity lam pawh an thuam ṭha a, an sipaite tana dinhmun ṭha zawk siamna turin 5G mobile network pawh a siam a ni," a ti.

Hei hi China-in Arunachal Pradesh bula infrastructure a din vawi khatna a ni lo a, nikum November thla khan satellite image aṭangin China-in AP ram chinah in 60 vel zet a sak chu hmuh theihin a awm a ni. Kumin January thla khan AP ram chhungah vek China hian in 101 awmna thingtlang khaw thar a din thlalak pawh satellite image-ah hmuh a ni leh bawk.