JCILPS-in Manipur-a ILP system duh khawp lo

Manipur sorkarin Inner Line Permit (ILP) kalpui mek chu ram leilung fate venhimna atan a ṭha tawk lo nia sawiin, an duh khawp lo tih Joint Committee on Inner Line Permit System (JCILPS) chuan a sawi.

JCILPS hi kum 2012-a Manipur-a ILP system hman phuttu pawl hrang hrangten an din a ni, ILP system an neih theihna atana sorkar nawrtu ber a ni.

Committee convener Phulindro Kosan chuan kum 2019, December 31 khan state sorkar chuan ram leilung fate venhimna tur atan an state-ah ILP system hman a nih thu thuchhuah a siam a, mahse he system ram leilung fate venhimna engmah a pe lo a ni, a ti. "He system hi a ṭha tawk lo. Hei vang hian state sorkar chuan ILP system chak zawk leh awmze nei zawk siam tura hma a lak a ngai a ni," a ti.

ILP system hnuaiah hian ram leilung fa chungchang chiang taka tarlan a ngai a ni tiin, an ṭhenawm Assam leh Mizorama an hmanah chuan an sawichiang vek niin a tarlang.